TVB記招疑醜化姜濤 馮盈盈自認「姜糖」撲火捱轟 網民：收皮世界女！
- 發布日期：2021-03-27 17:45
已複製
ViuTV的《全民造星》贏盡口碑，又成功捧紅姜濤，成為近年令香港粉絲瘋狂的偶像。眼見對手無論節目、劇集都來勢洶洶，TVB亦急召曾志偉及王祖藍回朝救亡，日前更舉行記招，介紹九大綜藝節目。記招上藝人鄧智堅以「薑蓉」身份出現，疑扮姜濤唱出《蒙著嘴說愛你》，又做出招牌「俾心」手勢。期間主持之一的馮盈盈在旁大叫：「你夠膽嚟踩場？打到你變薑蓉！」而阿Bob亦隨即助攻：「打佢！𡁻佢！」
事後一班「姜糖」認為有醜化偶像之嫌，更紛紛到鄧智堅fb洗版留言：「見到你個樣都感覺尷尬，肉酸！」、「識唔識咩叫尊重」，又嘲諷他是「暗星」。記招片段出街之後，惹來清一色負評，今日馮盈盈在Ig出post企圖撲火，首先她貼出和姜濤的合照，又上載自己睇騷時，一見姜濤出場就尖叫的片段，話自己真正身份是「追星族」。
馮盈盈更表示正在努力撲Mirror演唱會飛，寫道：「我一邊努力撲緊Mirror演唱會飛，一邊努力捍衛姜B喺我心目中嘅形象。嗰啲什麼姜蓉！？就算打扮得幾盞鬼，就算再向我姜B致敬，就算香港人再多幽默感，都接受唔到囉！今晚我實打多兩碗姜蓉撈飯食，咁先吞得落呢啖氣。冇咩事嘅話我出返去撲飛。」雖然馮盈盈自稱「姜糖」，努力撲火，但一班姜糖仍然唔收貨，繼續留言鬧爆：「收皮世界女」、「笑完人，喺度扮冇事？」
至於另一主持阿Bob，亦為事件出post公開道歉：「收到各位嘅意見，亦明白大家嘅感受。如果我嘅行為同言論令到任何人唔開心，我衷心同各位講聲唔好意思，對唔住。亦向姜濤同其他支持佢嘅朋友及粉絲表示，我為我一時衝口而出嘅不當說話令人有唔好嘅感受，感到十分抱歉，我亦會好好檢討我日後嘅言行。」面對呢場公關災難，阿Bob使出誠意，逐個負評留言回覆，以平息「姜糖」怒氣。
- 同樣是主持之一的阿Bob，亦為事件出post公開道歉，明顯較馮盈盈有誠意。
----------------------------
壹週刊 31年 和你壹路同行
回顧31年走過的路
----------------------------
和你壹起撐徽章 良心商店及網店有售
了解更多
-----------------------------
守住新聞自由 和你撐壹週刊計劃 每月港幣$300起
按此了解更多
來源 source: http://nextplus.nextmedia.com
|
鍾意就快D Share啦！
|
|
|