教長者演戲雖攰仍值得 陳桂芬開心助搵到「第二春」
陳桂芬（Brenda）最近在ViuTV劇集《無限斜棟有限公司》飾演沈殷怡（Shirley）媽媽「趙太」，雖然都是媽媽角色，但因今次會嘗試多個造型而䚁開心好玩，而且她認為跟年青演員合作更有新鮮感。講到19年開始開專業課程教授長者演戲，她坦言雖然有點攰，但看到他們搵到「第二春」相當值得。撰文：杜淑霞 攝影：張詠森
Brenda雖然認為電影電視不及舞台角色多姿多彩，但在《無限斜棟》再演阿媽，一樣好有發揮，「做阿媽都有好多種，今次拍得好開心，因為係個不同類型嘅阿媽，呢個阿媽係傻吓傻吓，我為咗修補同個女關係，而個女又係電影癡，所以扮好多電影造型，譬如：《德州電鋸殺人王》同《閃靈》嗰啲經典角色，雖然做人阿媽，但有咁多變化嘅話，對我係獎賞嚟。」
對於跟沈殷怡、陳卓賢、盧慧敏和黃定謙等年青演員合作，Brenda大讚他們，「佢哋都好虛心學習，休息時大家有傾吓，佢哋問我做咗幾多年戲，我話30幾年，入行佢哋都未出世，哈哈！我好鍾意同佢哋合作，有時有經驗覺得好厭悶，因為會有職業病，有套方法規矩去做，但佢哋用好直接反應去做，反而最好睇，我都成日提自己『切忌做戲』，外國有一套體系『No acting is good acting』，已經表演咗，唔係真正呈現嗰種生活狀態。譬如我同Shirley有啲感情戲，我望佢狀態我先會喊，我喊又影響咗佢喊，大家互相交流係感情嘅流動。」
不要歧視你年長
Brenda在12年成立劇團「Arts Options」，19年與領展「愛・匯聚計劃」合作「長・智・戲」長者戲劇藝術啟導計劃，為55歲或以上長者提供專業並具持續性的戲劇藝術培訓課程，發揮長者潛能。原來Brenda受14年看到日本劇場界國寶級大師蜷川幸雄執導的舞台劇《烏鴉，我們上彈吧！》所啟發，「嗰時係康文署邀約海外團體嚟香港演出，我睇呢個劇好似藝術品咁上台，演員平均年齡有成70歲，最大嘅有90歲，但佢哋照做專業舞台演員嘅嘢，睇完好震憾。跟住我去思考，香港啲長者成日參加社區活動，但都係純粹消閒，冇一個專業培訓，到19年領展聽完我哋構思，覺得好啱佢哋資助理念。」
由於課程打正專業旗號，課程總監設計了100小時課程，在160個素人中挑選了40人參加課程，平均年齡69歲，最老有90歲，但排練時確實遇上不少困難，除了受疫情影響外，還因長者本身問題，「佢哋排練時會成日用個『老』嚟做擋箭牌，唔敢冒險，譬如話『我記唔到台詞，阿爸有老人癡呆，我懷疑我都有』，我排練堂金句係『不要歧視你年長』因為佢哋成日話唔得，好似斬晒自己手手腳腳咁，冇試過突破自己。」幸好一班長者最終都能突破自己，令作為導師的Brenda好大感受，「教佢哋係有啲攰㗎！但我好開心見到老人家嘅轉變，第一年見佢哋有老態，𠵱家醒晒全部後生晒，好開心佢哋退休後展開『第二春』，為興趣出發變成專業，再成立自己劇團。」
|
鍾意就快D Share啦！
|
|
|