參加《全民造星》入行的ERROR成員193郭嘉駿，因為敢言寸爆TVB，所以人氣急升，IG followers由8萬幾，在個多月內，急升去到超過31萬。
在喜歡畀面派對的娛樂圈，突然如國王的新衣中的男孩說真話，贏盡民心。
但他絕非驕傲自大，剛剛相反，其實有少許自卑；同時懂得感恩，尤其是對Fans。
「七師傳（七仙羽）講呢個世界冇無緣無故嘅愛，其實有嘅，我嘅Fans就係呢啲人，我見到佢哋都好感動。頂，做訪問都喊添！」193流著淚說。
平日說話不矯飾，原來情感流露也直接，31歲的童顏「大男孩」，知佢乜嘢料
- 眼紅紅，眼眶滿了淚水，193感性又感恩。
缺堤淚湧
缺堤淚湧
193轉數快，說話也快，做訪問伶牙俐齒，揮灑自如。不過，說到Fans時，他突然語塞，眼睛紅了，一開口便缺堤淚湧。「我唔知點解佢哋會支持我！由《全民造星》開始，我係一個好廢嘅人，咩嘢都唔識，但竟然有人鍾意我。我好奇怪點解會有人舉牌，你係咪黐線，呢條友唔識得唱歌跳舞，個個話佢係廢柴。直至第一次出席一個牛仔褲品牌活動，發現有好多fans，點解佢哋會鍾意一個咩嘢都唔識嘅人，覺得好神奇。到我生日嘅時候，整咗個地鐵站廣告牌畀我。我都想同七師傅講番，呢個世界係有無緣無故嘅愛。」他眼淚漣漣地說。
抹掉眼淚，他哽咽補充：「當時我覺得好醜嘅……」未說完一句，他又忍不住落淚，頓一頓說：「Fans同其他人講193係自己偶像，唔係一件好光采嘅事，當時嘅193咩嘢都唔識，如果同朋友講都會笑佢。如果話自己偶像係姜濤，其他人都會認同你，因為姜濤咁charm，唱歌跳舞咁叻，其實都好正常，但我點同朋友講，自己偶像係193，佢咩嘢都唔識！」
- 談到Fans的支持，193感動落淚。
對於Fans無以為報
對於Fans無以為報
對於Fans的愛，他覺得無以為報，只能盡量滿足她們所求。「我係一個有求必應嘅黃大仙，其實覺得自己好黐線，有時候會諗自己係咪唔應該咁樣做，經理人都勸我好多次，例如fans想影相同簽名我都會做足，即使瞓少啲都會滿足佢哋要求，因為我覺得佢哋真係好支持我。我經常提醒自己，點樣可以報答佢哋，就係更努力，要做到好成績畀佢哋。每次我盡咗力去做某件事，例如演戲、做好綜藝節目同主持工作，佢哋見到會好開心，呢個就係我唯一可以報答佢哋嘅事」
初入Viu時，他試過幾個月沒工作，現在人氣急升，工作一項接一項，令他非常開心。
「依家真係多咗工作，好感恩多咗人認識我同ERROR。生活上嘅改變就係好忙，一直都話好想試吓有幾忙，但原來真係幾忙，而唔係淨係拍節目嗰種忙。同埋都真係多咗人認識，如果喺街上停低同人合照，其他人見到就會衝埋嚟排隊，都真係多咗好多人認識，感覺到終於似番一個藝人，唔係KOL嗰種。」
- 盡量滿足Fans的要求之外，193努力做好自己，作為回報。
迎戰鍵盤戰士
迎戰鍵盤戰士
有人喜歡他敢言，但亦有人不喜歡他的辛辣；愛他不愛他，沒有中間線。「其實所有inbox留言我都會睇晒，當然有好多人支持，話我講出真話，不過間中都有人會鬧。我好鍾意回覆鬧我嘅留言，例如用粗口鬧我嘅，我會話喺九展等你，經常會喺度返工，然後對方就唔會覆我，我好鍾意回覆呢啲留言。擒日先至回覆一位，佢話我夠膽鬧隔籬台，未死過呀？係咪想我打鑊你？然後我話好呀，經常喺九展，可以嚟搵我，不過之後佢又唔回覆我。有好多網民只係得個講字，唔夠膽行動，全部都係鍵盤戰士。」
現在他從容面對批評，但初入行時，對網民在facebook和連登的留言十分在意，「所有留言都會睇晒，然後好緊張、好介懷，直情想開個新帳戶去回覆。但發覺其實只係好少撮嘅人，嗰啲人講嘅說話好廢，純粹睇你表面就評論你。啲人最鍾意講嘅係，話193好廢，唔識唱歌跳舞，啲人眼光原來咁窄，覺得你唔識唱歌跳舞就叫做廢，有冇留意過我背後嘅付出？好膚淺，所以就心諗唔需要同呢啲無腦嘅人斤斤計較。有腦嘅人都會知道我做緊咩，開始慢慢睇化，然後發覺愈多人認識嘅時候，就會有愈多人批評你。」
樣衰唔通要整容
樣衰唔通要整容 之前拍《最後一屆口罩小姐選舉》，他甚至教組員不要看睇留言，如果睇的話，要學懂消化，「因為好多人只會不斷攻擊，例如話你樣衰，咁我可以點樣，因為係天生嘅，唔通去整容？我以前有睇討論區留言嘅時候，有啲人會提供改進方法，例如建議我跳舞可以用力啲，話依家跳得好樣衰，我會接受呢啲批評。」
錯失選校草 其實193自小已經想入行，中學時想過參加《Yes!》校花校草選舉，「不過當時冇呢份勇氣，會怕醜，覺得如果輸咗就好樣衰，擔心同學會取笑，所以最後都係冇參加。最終隔籬班有同學參加咗，然後攞到冠軍，不過佢絕對唔靚仔。（叫咩名？）我話咗唔靚仔，你仲問我咩嘢名？黐線咩！佢叫周天保。」據悉周天保曾闖娛圈，可惜並不成功。 ![193錯失選校草，反而鄰班的周天保（右三）當選。]()
- 193錯失選校草，反而鄰班的周天保（右三）當選。
自爆扮病考TVB訓練班 在英國讀大學時主修心理學，更在當地讀時裝課程，畢業回港先後在連卡佛和IT做過時裝買手，期間曾投考無綫藝訓班。
「參加《全民造星》之前做時裝工作，當時都有報考隔籬台嘅訓練班，有網友話我被發現呢單料，但其實係我自己講出嚟，我的確係有參加過，而當時有一件事好厲害嘅係，我演技好好，為咗慳假期唔請假，我扮病，上晝返咗兩個鐘左右就扮病，仲要扮到面青口唇白。然後上司話我嘴唇都白晒，叫我快啲走，佢直情趕我走，然後我即刻去咗將軍澳。不過，最終都冇成功被取錄。」
參加《造星》時，他覺得「自己唔再年輕，已經二十八歲。如果二十八歲都唔嘗試的話，其實呢一世應該都唔會再試，可能去到五、六十歲嘅時候，會同番自己個仔講，好後悔當時無參加，然後唯有鼓勵個仔去做，因為自己已經做唔到。我唔想畀自己後悔，所以咩嘢都嘗試一下，失敗的話就做番時裝，如果成功的話，可能就係另一個人生，好似依家咁樣，真係完全唔同晒。」
如果被TVB取錄…… 被問到沒被TVB取錄，如今看來是否執一身彩，他客氣的說：「又冇話慶唔慶幸嘅，大家都唔知未來嘅事，我參加藝員訓練班嘅時候，ViuTV好似仲未有。當時叫做係無得揀，如果想加入電視台的話，都係只有TVB，所以就嘗試吓。」
之後他回復寸嘴本色，一語相關，暗寸楊明說：「如果入到的話，話唔定依家已經賣緊燉湯，可以亂揸車，邊個知道？話唔定已經返咗大灣區，仲喺度同你哋傾偈？」
簽約Viu後，他曾經入不敷支，「好彩一向有儲蓄，同埋讀書或者工作期間，都有做啲時裝炒賣生意，我會買入一啲香港冇嘅牌子，然後轉售。例如有啲俄羅斯或者瑞典嘅品牌，我覺得幾靚，因為香港未有代理，所以就會買返嚟轉售，有時放到內地網發售，生意會更好。當時做呢啲炒賣生意係賺到錢，但其實公司都好好，至少會有底薪，數目雖然唔足夠生活，但足夠生存，嗰筆錢可以足夠食飯搭車。」 ![如果入了TVB，193未必像現在般受歡迎。]()
- 如果入了TVB，193未必像現在般受歡迎。
一腳踢搞自家品牌 入行後有段時間工作不多，他趁空檔成立自家品牌賣Tee。
「直情自己設計、order、寄貨，所有客戶服務都係自己負責。我會形容自己係想賺盡所有錢，我係比較孤寒嘅人，唔想搵人幫手，然後要分一筆錢畀對方。不過依家迫於無奈都要搵人幫手，幕前工作太多，自己搞唔掂。」他有點無奈。
「迷戀」姜濤 參賽時，有網民指他「迷戀」姜濤，他笑嘻嘻金句王上身，連消帶打兼暗寸曾聲稱是「姜粉」的馮盈盈。
「我一向都迷戀姜濤，我係姜糖，唔係姜粉，唔會亂話自己係姜粉，我係有follow姜濤，所以先講得出自己係姜糖。其實唔係迷戀嘅，因為我覺得姜濤好有自己嘅舞台魅力，佢喺舞台下可能係一個鄰家傻更更嘅男仔，但上到舞台就會變得好charm，所以我覺得佢好厲害。我係欣賞佢，而唔係迷戀，好欣賞呢個人，因為香港真係唔係好多呢類型歌手。」 ![193認真表演，但卻被認為是搞笑。]()
- 193認真表演，但卻被認為是搞笑。
曾狂拍散拖 193絕對愛女生，坦言曾不停拍散拖。他外形不錯，追女沒難度吧？他直言：「覺得唔差，但當然唔係去到靚仔，不過算係五官端正，相比身邊好多人都唔係五官端正嘛，所以已經係一個優勢。當然有好多人比我更靚仔，不過覺得自己五官端正，都算OK嘅，唔算係好樣衰，正正常常，應該都算OK。」
小時候拍過好多次拖，「我真係唔記得心態係咩，但有段時間真係不停拍拖，一兩日散拖又有，都唔知算唔算係拍拖。然後一兩星期又有，我已經諗唔起嗰個階段係為咗咩？拍散拖只係唔識得諗，當時都唔知道乜嘢係拍拖同愛情。到中學最後階段，已經開始穩定，有時候會拍吓長拖。」 ![在英國讀書時，開始對時裝有興趣。]()
- 在英國讀書時，開始對時裝有興趣。
只愛亞洲女生 他最長一段情有三年，是英國的同學。問到可有跟外籍美女相戀？他笑稱：「冇呀，我只係鍾意亞洲面孔。其他人經常會問，喺外國讀書，有冇溝過鬼妹？我係絕對冇，可能係覺得佢哋好狂野，自己接受唔到。女友全部都係講廣東話，純粹唔想講咁多英文，語言能力有限。同埋喺鄉村仔讀書，嗰啲日本同韓國女仔都唔係好靚，反而越南嗰啲幾靚。」 ![新歌MV的女角，也許是193的心水類型。]()
- 新歌MV的女角，也許是193的心水類型。
跟Dee姐是好朋友 談到跟同台的Dee姐傳緋聞，他笑笑口大耍太極說：「我同佢絕對係朋友，感情事我唔回應，留番俾經理人回應，因為我都係偶像，呢方面唔可以提。」
問到覺得她靚唔靚？193非常啜核，竟說：「如果我話佢靚，即係話Dee哥靚，但Dee哥真係好醜。呢件事令我諗咗好耐，究竟應該話靚唔靚呢？直至依家都未思考到。有一次拍《ERROR流忍者》，見到阿Dee側面，覺得點解咁似Isabella（Dee姐），嗰一刻真係覺得好似。不過點都好，我界定唔到靚唔靚。」
當初被發現去同一間café打卡，即傳撻著，他解釋：「好朋友嚟嘅，其實唔係交唔交心，係去打個咭。呢個係廣告策略，如果我嘅IG有好多廣告，其他人會覺得你唔夠親民，然後會unfollow你，所以要貼番啲生活照。然後要拍咩生活照？就係去飲吓咖啡，喺海邊突然回頭一望，嗰啲就係生活照，令IG感覺冇咁廣告，呢個純粹係民意調查結果，所以大家係朋友。」
談到擇偶條件，他說：「合眼緣就一齊，我有開心事可以分享畀佢，然後我唔開心佢又可以幫我分擔，最緊要大家投契，其實冇咩擇偶標準條件，或者係咪需要拍好長時間。我絕對相信兩個人如果情投意合，互相適合對方，好自然一定會維繫好耐。」 戒買潮牌想早日買樓 事業有突破，廣告不絕，193坦言想買樓，「交租就等於幫人供樓，雖然我唔係冇能力畀首期，有啲只需要一成首期。問題係我覺得樓市會跌，但等咗好多年都完全冇跌過，好離譜。少爺占經常叫我一定要買樓，已經提過幾次，賺到錢就一定要買樓，佢喺呢方面的確係一個榜樣，我就知道呢方面原來係咁緊要，或者之後會幫我慳番好多生活費，所以呢個係我嘅目標，希望可以盡快買樓。」
由於他是時裝狂迷，家中放滿潮牌，連廚房也放滿衣物。如果不買樓，可能會用晒嚟買衫？
「依家唔會，因為入行之後開始知道，買咁貴一件衫，其實著一兩次已經俾人認得，其他人會話你經常著同一件衫，所以依家開始好少買衫，除非我嗰件衫好靚，需要收藏，然後先至會買。依家多數會著贊助嘅衫，或者幫襯連鎖服裝店，例如U記嘅淨色衫，其他人唔會認得你著過幾多次，售價又平。」
以前他狂買衫，歷年花費不少，「投資喺時裝上嘅錢真係好多，一啲舊衫我唔捨得掉，因為買入嘅時候好貴，不過依家又唔會著，有啲鞋都好貴，已經爛晒都唔捨得掉，因為覺得好有紀念價值，係陪伴我成長嘅回憶。不過都真係用咗好多錢，計唔到幾多錢，但的確好多錢。絕對需要搬大屋，唔一定係大屋，但至少要有一間房畀我擺衫同鞋。依家間屋絕對唔夠放，我諗緊係咪應該租一個迷你倉，或者一間新屋。」
成為人氣王，相信他很快實現置業夢。
採訪：Stephanie、Cynthia
攝錄：曾惠衛
化妝：Rainbow & Cori @Annie G. Chan Makeup Centre
頭髮：Leo Fan @Chic Private i Salon
服裝： FENDI (full set)
![193全屋放滿衫，過去是時裝精，狂掃潮牌。]()
- 193全屋放滿衫，過去是時裝精，狂掃潮牌。
- 193錯失選校草，反而鄰班的周天保（右三）當選。
- 如果入了TVB，193未必像現在般受歡迎。
- 193認真表演，但卻被認為是搞笑。
- 在英國讀書時，開始對時裝有興趣。
- 新歌MV的女角，也許是193的心水類型。
- 193全屋放滿衫，過去是時裝精，狂掃潮牌。
來源 source: http://nextplus.nextmedia.com
|
鍾意就快D Share啦！
|
|
|