34C「東張咪神」李旻芳與同是《東張西望》主持的黃耀英結婚1年多，雖然尚未有愛情結晶品，但一直對兩隻金毛尋回犬「妹妹」及「BB」寵愛有加，在牠們3個月大時便開始領養，轉眼間已互相陪伴16年，狗狗亦見證她多個人生重要時刻，其愛狗的真誠還感染另一半。
面對「BB」年事已高，甚至不良於行，本來住唐樓的旻芳，不惜每日孭住重達20多公斤的「BB」上落樓梯，無奈今年2月「妹妹」因癌症離世，一個月後「BB」確診有惡性口腔黑色素瘤，令夫婦二人晴天霹靂。
「BB」自患病後，已先後動過多次手術，醫生當時表示一般情況只剩下3個月命，若然狗狗太辛苦，可選擇安樂死，但旻芳與老公萬般不捨，經商量過後終決定為「BB」搬新居，望轉換新環境可紓緩病情外，希望「BB」的餘生，能活得快樂。
近日旻芳以首置身份，以近700萬元買入位於西貢的一個低層連花園的單位，單是花園已有200多平方呎，絕對有足夠空間讓狗狗活動！雖然上手業主花費近百萬元豪裝，還設有閣樓兩個房間，但為方便「BB」走動，旻芳不惜捨棄兼大翻新，全屋鋪上軟墊，「BB」休息及睡覺位置，跟他們一樣同在地下那層，就連花園也特別設計，一切以愛犬為首，務求於「BB」最後歲月中，為牠付出所有愛。
日前兩人難得放假，即孖住出動睇家具，到大型傢俬連鎖店兜了一圈後，似乎未合心水，之後移師到戶外家具區，黃耀英睇中一張長型休閒座椅，與旻芳研究並調校高度後，即席試「攤」，一臉享受的他更着太太試埋一份，不過當看到價錢牌卻眉頭一皺，似乎超出預算。
商量片刻後，他們走到另一邊睇燒烤爐，隨即又興致勃勃討論擺位，旻芳更講到眉飛色舞，似乎對整座組合相當有興趣，即使離開時也忍不住回頭一望。接着二人走到電視區，對70吋的大電視露出心心眼，不過同樣是齋睇冇扑槌。
之後他們轉戰餐廳醫肚，快食一輪後便拎住一袋外賣，繼而拖住手行超市，起初走到罐頭區時左揀又揀，接着又睇即食麵，但旻芳均睇到擰擰頭，並向老公撒嬌說：「今日冇特價，唔抵買，留番下星期特價日再入貨！」說時遲那時快，她抬頭一望看見雪藏食物區掛住一個減價牌，即二話不說衝上前，並拿起購物籃瘋狂入貨，之後便與老公排隊結帳離開。精打細算，明顯是為「BB」買樓而慳到盡！
旻芳接受東網訪問，透露現時「BB」距離醫生預計的壽命尚有2個月，故會密切留意其生存意志：「依家還好，肯出街、肯食嘢同飲水，算係精神，但個口成日流血，塊面腫晒，都做咗好多次手術，係心痛佢咁樣，但另一方面唔想佢辛苦。（新居為BB而設？）都係，所以成日叫佢加油，因為都要裝修幾個月，仲搵埋設計師全屋整晒軟墊，如果萬一『BB』情況唔樂觀要走，老公講過會將兩隻狗狗嘅骨灰混合，整條鑽石鏈畀我戴住，代表時時刻刻同佢哋一齊。」
來源 source: http://hk.on.cc
|
鍾意就快D Share啦！
|
|
|
