戴「讀唇友善」口罩做慈善活動 羅天宇蔣家旻與基層兒童齊焗餅
羅天宇和蔣家旻早前以「星級義工」身份，現身慈善團體福幼基金會舉辦的「小題大做X奇華工作坊」活動，與一眾基層兒童一齊學整蛋撻及唧花曲奇。當日，兩人戴上「讀唇友善」口罩現身，並協助小朋友搓麵糰、倒蛋漿等，見到兩位哥哥、姐姐的親切笑容，大家都好快打成一片，二人表示多得防霧透明窗醫用口罩，令人與人相處回復昔日「無罩」的親切感。採訪：譚壹致
羅天宇和蔣家旻甫抵達現場即洗手，隨即穿上圍裙同一班小朋友齊齊整餅，其間二人都好有耐心地從旁指導。講到疫情持續一年多，天宇稱因藝人是群體工作，台前幕後也要做足防疫措施，以免「三長兩短」，他說：「以前警覺性好低，即使打完籃球都求其用水洗吓隻手就算，但其實好多菌，而家會用梘液、消毒搓手液，仲會幫人噴埋。屋企門口都有一大支消毒噴霧，朋友嚟到要全身消毒先入得屋。」
拉近返距離
提到戴罩的不便之處，家旻表示，除了長期戴口罩好易整花妝容外，她又認為：「戴口罩會令人誤會你少咗笑，因為淨係望到雙眼，可能人哋唔太認識你就會覺得你惡。」雖然大家已盡量瞇瞇眼笑，但天宇仍覺得難以取代展露微笑的親切感；家旻續指，「而家戴住『讀唇友善』口罩，可以防菌又見到個嘴、睇到我笑，變相同人親近啲，好似冇戴口罩咁。」並謂許多時別人士也很難聽得清自己講嘢，天宇說：「尤其聾啞人士，佢哋靠手語同讀唇先知人哋講咩，所以呢款口罩好好，溝通上方便好多。」
來源 source: http://hd.stheadline.com
|
鍾意就快D Share啦！
|
|
|