2021年8月16日星期一

【好養眼】首做Model有超模風範張兆輝讚女兒考試成績超卓好感動 #張兆輝

【好養眼】首做Model有超模風範張兆輝讚女兒考試成績超卓好感動

索爆張兆輝17歲囡囡張卓姿（Twiggy）首次為時裝雜誌做Model，有板有眼。

近年愈來愈多遺傳咗Daddy或Mummy優良因子嘅「星二代」，而且唔單止樣子甜美，樣貌標緻，天生一副明星相，更擁有一副Model身形，相當有星味。

除咗「性感女神」邱淑貞和時裝公司老闆沈嘉偉嘅「餅印囡囡」沈月、「女神有望」龔慈恩囡囡林愷鈴、「何家最美千金」何超蓮、擁有43吋逆天長腿，任達華與名模琦琦嘅愛女任晴佳（Ella）齊被封為「最強星二代」外，張兆輝17歲「前世情人」張卓姿（Twiggy）都靚到爆。Twiggy長髮披肩，身形纖瘦，皮膚白裏透紅，連眼神都識笑，一雙電眼相當有吸引力，被形容係少女版李嘉欣及鍾嘉欣嘅混合體。

昨晚輝哥喺fb上載抖音短片，片中Twiggy由「陽光少女」變身cool look首次為時裝雜誌做Model，Twiggy一舉手一投足自然流暢，而且腰圍非常纖細，流露輕熟女一面，相當養眼。身在內地嘅輝哥留言：「你讀攝影，媽咪話讀攝影必須學識畀人影，所以你的第一份暑期工作，我認為合格的。」

輝哥又大讚喺英國完成中五程度嘅Twiggy成績超卓，輝哥開心說：「GCSE成績表居然能拿到那麼好的成績，你説你有很努力溫書，只是末派成績表(前)不想説，我的寶貝珠#Twiggycheung，你令爹d好開心好感動，張兆輝。」原來Twiggy唔聲唔聲考獲5A2B，眼見阿女又靚又叻，作為父母唔開心就假啦，張卓姿加油呀！唔知Twiggy讀完書會唔會入行承接爸爸嘅衣砵呢？