獨家｜江嘉敏自認「辣椒仔」 學懂帶眼識人
TVB新劇《七公主》正在熱播 ，劇中江嘉敏演技大突破做雙面人角色，飾演鋼琴老師的她在家中是「純純兔」，實際卻是騙子集團老千，為求進步江嘉敏自掏荷包找老師上堂學戲，入行四年的她成功演活角色令網民大讚！
撰文∣Cynthia 攝影∣鄧國良
由黃翠如、林夏薇、高海寧、江嘉敏、陳瀅、鄺潔楹、劉佩玥、陳曉華等主演的TVB劇集《七公主》，講述隱形富豪逝世後留下七個遺願給七個同父異母的女兒，姊妹間接受不同任務期間，除了恩怨情仇劇情，又有戲劇元素，成功吸引不少觀眾追看。
劇中飾演四妹的江嘉敏，入行四年機會不斷，監製陳維冠更大讚江嘉敏有天份兼夠努力，不斷給她機會在劇集發揮，江嘉敏亦非常感恩：「其實我和Joe監製很有緣分，因為我們第一套合作的劇集就是《跨世代》，當時他並不是一開始就找我，而是開了劇集一個月左右，碰巧有新角色才想到用我。那時候我還是新人，很多監製其實沒有怎樣留意我，拍完第一套劇集《親親我好媽》我就去咗拍綜藝，所以根本冇乜監製認識我，但就是Joe監製夠大膽，認為新演員可以一試，然後就一齊合作咗第一次！到後來《殺手》、《跨世代》到《七公主》，九月開新劇都會和他再合作，覺得好開心，是緣分！」
自認似「炸彈」
江嘉敏在劇中做雙面人，表面是斯文鋼琴老師和乖乖女，實際卻是騙子，與丁子朗有感情線，問到角色是否跟現實中的自己一樣，她直言自己是「辣椒仔」，「我唔會形容自己真人係神經質，可能係辣椒仔！或者係一個炸彈，但唔係神經質。我之前真係飾演過分裂的角色，即是心理上有點問題，但今次《七公主》這個角色我不會形容她是分裂，而是一個完整的人。因為大家姐是黃翠如，二家姐就是高海寧，我在她們面前就是和事佬，在她們面前就係純兔，好乖好聽話，咁另一方面我係一個鋼琴老師，表面係一個好賢淑嘅老師，但背後我有一個詐騙集團，兼且我是一個final boss！初時都曾經和監製質疑角色會唔會很跳？但他和我分析舉例，指我在他面前、導演面前、以及媽咪面前嘅態度同埋處事都會不同，所以其實不是分裂，角色係一個好完整的人，人就是這樣，好像我在珍姐（曾勵珍）面前的態度亦會截然不同，哈哈！」
入行四年，江嘉敏為求進步，更加自己俾錢上堂學戲，自我增值，「我是自己俾錢學演戲，我都希望公司可以開班俾我，等我可以一路做嘢一路學！其實我拍第一套劇的時候已經上acting class，因為我拍長劇之前都係拍廣告，電影或者微電影，大家都知TVB的schedule係比較密，之前就未有時間再上堂，之前我知高海寧同埋Ali（李佳芯）都有去上堂，所以熟咗就叫佢哋介紹老師給我！其實我已經上過幾個老師的演藝班，拍《七公主》之前有上過堂，拍完這套劇亦有上堂，上堂後發現自己其實有很多拍劇期間不會為意的問題，好有幫助。」
曾與屋企人「頂到行」
入行前是鋼琴老師的江嘉敏，今次在《七公主》做返老本行，有機會展現琴技，令母親老懷安慰，江嘉敏說：「如果我冇入行，可能我都仲係教緊鋼琴！我兒時希望做演奏家。我覺得今次監製叫我做鋼琴老師是專登，因為拍之前佢有問過我入行前做乜，我有同佢講我做過鋼琴老師，跟住佢就安排咗我喺劇入邊做鋼琴老師，最開心應該係我媽咪，佢細個投資了很多資金給我學琴，教教下琴我就去咗做演員，本身佢都有點揼心口，𠵱家有機會可以show off下琴技，佢都幾開心，老懷安慰！」
現實生活中，江嘉敏直言在家中和對外的自己反差不大，「我覺得自己屋企同出邊都冇乜太大反差，我都係比較熱鬧同埋鍾意講嘢嘅女仔，所以係朋友面前或者屋企都係擔當一個係咁講嘢、帶歡樂給大家的人。細個同屋企人真係頂到行，同媽咪係火星撞地球，因為我哋性格都比較相似，所以我都幾肯定我唔係執返嚟！然後我細妹又有樣學樣同屋企人又係頂到行，不過大個咗好好多，因為思想成熟咗，同埋我老了，冇咁多氣力頂嘴！𠵱家媽咪應該覺得我乖咗！有時媽咪會話覺得我係一個好家姐，但唔係一個好女兒，因為我好錫細妹，細妹話想要乜、去邊度我都會滿足佢，但媽咪講嘅嘢我就成日唔記得！哈哈」
看見女兒有成績，江媽咪亦都由反對聲音變做支持，「其實我好感動，因為媽咪比較嚴格，睇到佢由唔支持嘅態度，到𠵱家會send message俾我話我啲劇集幾時出街，又會問點解今集劇集無我份，佢追我嘅劇多過我自己追自己嘅劇集，幾感動！佢哋亦都會俾好多意見我！有時捱夜好殘佢都會煲好多湯水！」
和男友無所不談
是非不斷的江嘉敏，如今明白到要帶眼識人，但亦會堅持做自己。「其實我不嬲都係做自己，我覺得點解大家會誤會我，係因為我真係太多嘢講，太嘈喇！𠵱家可能會比以前靜啲，因為真係冇咁好氣，好攰！以前會唔識得分時候，乜都係咁講、係咁傾，𠵱家就會識得睇時候，例如有啲好重要嘅場口，就會認真對待，當然我不嬲都好認真，但以前會花好多時間去傾偈！要帶眼識人係真嘅！我又冇覺得成班女仔一齊就會多是非，好似《七公主》唔止七個女仔，好多人都問我今次拍劇會唔會成日好嘈，好多是非，勾心鬥角？今次真係冇，唔一定係女仔聚埋一齊就有呢啲嘢！」健談的江嘉敏，更被封為TVB三大喇叭，她認為稱號是正面的，「公認係三大喇叭，冇得唔認！大家都是希望熱鬧，想氣氛好，當然我哋都識得睇時候去搞氣氛，我覺得呢個稱號是正面的！」
江嘉敏與電競公司高層男友Anthony拍拖三年一直恩愛，她認為二人相處舒服，亦都無所不談，談到拍劇有事需要親熱戲，她就表示男朋友唔介意，更會一起研究，「我哋會一齊睇，牀戲暫時未拍過，錫戲就有試過，我哋都會研究點樣錫會好睇，我都有問過佢會唔會介意，佢話唔會，明白這是我的工作需要。佢仲同我講以前係童星，不過我唔信！」搞鬼的江嘉敏，亦都隔空向男友撒嬌：「起初拍拖他會經常接送我，等我現在乘機投訴先！佢都屬於細心，之前都會煲下湯，因為𠵱家工作忙就少咗，但如果我凌晨收工揸唔到車，佢都會來接我，買支水給我，不過煲湯呢排就真係少啲！或者我都應該抽時間煲返湯給佢飲。」
和昔日好姊妹馮盈盈因為一次船P傳出不和，問她會否對水上活動有陰影？江嘉敏笑言：「這陣子我經常拍水上活動節目，已經黑了很多，夠了！我覺得自己就嚟變非洲人！」
原文《星島日報》名人雜誌（逢周日見報）
|
鍾意就快D Share啦！
|
|
|