藝人陳自瑤（YoYo）日前生日時獲送巨型玫瑰花，雖然未有透露係咪老公王浩信送，但日前兩人就夫妻檔出席周勵淇生日聚會，力證情不變。人逢喜事精神爽嘅佢，上載新片玩快問快答找數！
有網民問到佢「鍾意生仔定生女？」YoYo就秒回「生女」，因為覺得女仔可愛啲，「揀拍劇定做全職媽媽？」佢就揀拍劇，因為拍劇可以同時湊小朋友，咁「平時買名牌手袋定普通牌子？」佢就自認係慳妹，而「家庭定事業？」佢話揀唔到，兩樣都要！當網民問佢「養貓定養狗？」佢就話依家養緊隻狗仔，但自爆好多時風水師都叫佢養貓！
被問到鍾意以前家依家嘅自己時，佢諗咗陣回答：「現在嘅自己，因為比起以前點都會有少少進步。」咁如果可以回到過去或去到未來，佢就話想回到過去：「未來無論點都會發生，你會慢慢踏進你嘅未來。但如果唔選擇返去過去，就永遠都返唔到過去。」而最多人問佢嘅問題，就係要喺好姊妹黃翠如及連詩雅之間做選擇，佢就選擇唔揀！最後佢多謝大家支持，訂閱人數已經超過7萬，話如果過10萬，會送個驚喜畀大家咁話！
本文作轉載及備份之用 來源 source: http://hk.on.cc
|
鍾意就快D Share啦！
|
|
|
