由內地女星楊冪、白宇領銜主演內地劇《謝謝你醫生》，本來喺2019年11月19日開拍，預計2020年3月煞科，但因爆發新冠肺炎疫情，齣劇又要喺醫院取景，所以無奈要停拍，連劇組都暫時解散，結果停咗582日，喺9月先有得再開機。
呢套劇可謂禍不單行，幾時拍完、幾時播出都未確定，但係已經畀網民鬧爆，被狂插嘅原因係楊冪嗰執頭髮，皆因有網民留意到飾演醫生嘅楊冪一輯劇照，話佢扮演急診科外科醫生，點可能容許到佢面前嗰條劉海咁長，幾乎連眼都遮住埋，咁醫生喺關鍵時刻搶救傷者時，可能就係被呢執長髮阻住視線，而耽誤咗急救人嘅黃金時機。
所以啲網民勸楊冪要做好醫生嘅角色，就唔該佢放低偶像嘅包袱，一係剪短佢執劉海，一係就紮起佢，再唔係就戴番頂手術帽，又搬蔡少芬出嚟，話當年佢拍《妙手仁心》時係剪咗短頭髮，叫楊冪好好向前輩好好學習吓，似乎啲網民未定齣劇播出，已經入晒戲。
本文作轉載及備份之用 來源 source: http://hk.on.cc
|
鍾意就快D Share啦！
|
|
|