藝人糖妹近期忙到爆，除咗做無綫《勁歌金曲》主持外，又要趕拍《四十二章經》及《童時愛上你》兩齣劇集，曝光率多咗，自然搵錢機會相應提升，最近佢就為醫美中心做代表言人，由於個形象變晒，由甜姐兒升呢做輕淑女，有廣告工作人員喺拍攝硬照時，就話原來佢有啲似全智賢。
佢話今次變靚咗，除多得有醫美中心贊助keep住做Facial外，全靠Eric Kwok個老婆葉佩雯（Grace）幫手搞形象，同埋多謝合作咗好多年嘅髮型師Green幫佢改造，令佢跳出小妹妹嘅框框，變得有型又有啲女人味！
糖妹接受訪問時話：「好感激Grace仗義幫忙，每次錄《勁歌》都幫我搵衫，甚至連私伙首飾都借埋畀我，佢話我呢個高度，可以用服裝配襯搞視覺效果，令我對腿睇起嚟會長啲。」又覺得Grace親切得好似家姐咁，Grace仲分享當年做歌手嘅心得。而Grace受訪時表示：「我做形象都係邊試邊玩，都冇乜壓力嘅，同糖妹又係朋友，喺溝通上會易搞好多，我自己都好多朱義盛（首飾），攞出嚟畀佢襯衫，我覺得幾好玩囉。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|