影帝古天樂（古仔）、林家棟、王丹妮及廖子妤等，今晚（9日）出席電影《梅艷芳》首映及音樂會，場面墟冚。談到拍攝種種，古仔透露：「畫面能夠呈現番當年嘅香港，覺得好神奇，相信好多千禧後應該都唔太知道咩係荔園、先施同妙麗百貨，團隊資料蒐集嘅過程都幾有趣兼困難，但最後都一一克服。」
問到拍攝中最難忘的一幕，古仔表示：「都係喺紅館後台，帶佢（扮演梅艷芳的王丹妮）出台嗰幕，明明知道佢患重病已經撐唔住，但依然死撐。（喊咗出嚟？）好多場戲都喊，好多回憶返晒出嚟。（有場畀王丹妮嚇親？）佢着住紅色旗袍，喺轉角行出嚟，同梅姐真係十分神似。」被問到對梅艷芳的印象，古仔不諱言：「我同梅姐未合作過，見面都是只是一、兩次，但印象中覺得佢係一個永不放棄嘅人，而且好有義氣，會提攜後輩。」問到古仔最欣賞梅姐歌曲？他笑答：「《壞女孩》同《似水流年》，我爸爸每朝早都會聽，媽咪就聽粵曲，我自己就鍾意聽sound track，唔鍾意有人聲嘅，屋企好似聯合國一樣。」
家棟則再重提梅姐是自己偶像，合作時對方不時要求他講笑話：「我係佢粉絲，集齊晒佢所有嘅唱片，能夠同佢同場演出感覺有啲奇怪，我要求佢幫我簽名，留到依家。梅姐係個好有毅力、同埋努力嘅人，好值得欣賞。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
