型男林峯拍攝內地劇《星辰大海》時，一場對住內地花旦劉濤嘅咆吼戲，演技大爆發，原來除咗激動到連太陽穴嗰條青筋都有戲外，仲有爆樽嘅火爆場面，當佢一手推走玻璃杯時，碎片四散落地外，仲有血喺手指罅度流出嚟，嚇到有幾位工作人員都真係喊咗出嚟，因為佢真受傷，啲工作人員好擔心，所以立即成村人圍住佢，幫佢傷口消毒兼處理。
佢見啲工作人員騰晒雞，就不斷安慰佢哋話自己冇事、唔使擔心、唔好慌，仲話受傷只係小事，更為咗令身邊人放鬆心情，講笑咁話：「劃傷也不要緊，自己又不靠臉吃飯。」令劇組差啲要對佢嘅專業精神致敬。
而林峯嘅付出係冇白費嘅，雖然有啲網民批評劉濤現老態，外樣同林峯一啲都唔CP，不過齣劇嘅收視一直高開，播出街冇幾耐，收視創下2021年度省級衞視嘅收視率紀錄，預計更可以成為湖南衞視收視年冠作品添，贏得咁多好評，似乎佢喺內地大有機會問鼎視帝寶座喎。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
