ViuTV選秀真人騷《全民造星IV》今晚（9日）繼續進行96強一對一淘汰賽，今屆吸引有好多獨立樂隊參加，新一集就有獨立樂隊晚安莉莉嘅主唱Sinnie參賽，但兩位導師許廷鏗同梁祖堯（阿祖）、經理人花姐同Wing邊睇佢演唱就邊頭擰擰，批評聲不斷，斥「帶動唔到氣氛」、「好難聽」，不過佢嘅對手Rapper Karen畀佢哋嘅印象都唔係好得去邊，零壓場感之下被指眼神唔夠堅定，花姐更直斥：「聽唔到佢唱咩！」最終Karen憑3票入圍，再由評判揀入阿祖Team，但阿祖揚言：「佢入嚟我個組就要佢放棄Rap！」
第二組對壘有做Model嘅穎蕎同跳舞老師嘅Yanny，二人同樣以露腰裝出戰，後者表演啦啦隊舞大晒青春氣息，但難道最高嘅動作只係被抬高，欠缺睇頭之下，揀跳唱的穎蕎晒唱功脫穎而出，獲全票晉級。
第三小組先有被Wing、網民睇好嘅靚女醫生咖喱，係隊中嘅義務軍醫，佢自爆為參賽已經辭咗公立醫院醫生一職，覺得幫人之餘，都想追夢、做自己鍾意嘅嘢，但人紅自然是非多，被花姐爆佢同製作組起衝突，全因佢唔滿意製作組拍攝嘅方法，拍MV當日佢個朋友因為等得耐而覺得好委屈，咖喱出面妨礙鏡頭，就係為咗唔畀影到喊緊嘅朋友，而事後佢反省過後認衰。咖喱揀咗跳唱做表演項目，唱至中段更除去外套，但都不及喺演藝學院畢業嘅Hannah表演嘅藝術舞蹈咁Powerful，被Hannah壓倒性擊敗。而最後有Ariel對何佩，選擇跳舞作賽嘅Ariel成日都以黑面示人引來負評，但原來同佢細個被校園欺凌缺乏自信有關，所以佢先築起黑面「防護罩」，而對手何佩嘅演出就要聽晚（10日）先揭曉！
本文作轉載及備份之用 來源 source: http://hk.on.cc
|
鍾意就快D Share啦！
|
|
|
