2021年11月1日星期一

張繼聰識歎獲娜姐經理人四手按摩老婆Kay酸爆留言：好正喎 #Kay #周秀娜 #娜姐 #張繼聰 #謝安琪 #麥當娜

張繼聰識歎獲娜姐經理人四手按摩老婆Kay酸爆留言：好正喎

張繼聰獲娜姐和經理人四手按摩，似乎好享受。

由張繼聰和周秀娜（Chrissie）主演的電影《馬達．蓮娜》剛剛上映，二人近日孖住四出到戲院謝票。昨日（31日）張繼聰於社交網分享了1條片及兩張謝票花絮相，相當好笑。第一條片，二人正在尖沙嘴大街上行向戲院方向，Chrissie便在街道上扮粉絲大叫︰「張繼聰、張繼聰，你係咪張繼聰？」然後張繼聰又搞笑反擊︰「唔該行過少少，周秀娜喺度呀！周秀娜行尖沙咀呀！好正呀！好正呀！」並在IG寫道:「同Chrissie落尖咀，要揚出去」。

第二張花絮照片，二人坐在後樓梯，背景還掛著底衫、雜物等的「休息室」，並寫道:「臨入場謝票大會安排嘅休息室，好正」有網民留言表示「休息室」的安排太唔尊重，阿聰即留言澄清：「一出去已經喺戲院門口，工作人員好照顧我哋」。

最後一張花絮照片，便有娜姐為阿聰按摩腳仔，阿聰留言︰「最近拍打戲，對腳攰到廢咗，Chrissie同我經理人幫我按摩，夫復何求！」獲四手按摩，張繼聰認真識歎，可惜卻引來老婆謝安琪（Kay）呷醋留言︰「1）好正喎 2）好正喎 3）好正喎 PS︰陰功隻腳咁嚴重又唔講，我其實識一啲古法治療，你放工返嚟試吓吖！」不少網民都紛紛留言笑指：「按摩完都冇用，返屋企咪又要跪玻璃」、「你大檸樂啦」。