頭條獨家丨張偉文再接受腰椎手術雙腳有返啲力 經理人方俊好感動
因爆發第5波疫情，「靚聲王」張偉文餘下兩場本月12日及14日嘅《友情有義演唱會》被迫延期，張偉文好友兼經理人方俊(Aman)只望改期不會影響到票房，因為張偉文會用今次的演出歌酬來付擔6位數字嘅腰椎手術費。
強壯肌肉後試行
張偉文年前患病不良於行，幸得友人、歌迷等支持，當中樂壇好友Aman出錢出力，關心他健康、起居飲食，對偉文照顧更是無微不至。Aman認為有健康最重要，尤其想改善到偉文嘅生活質素，出入唔使依賴輪椅，所以按腦脊椎專科藍醫生提議，原先安排張偉文完成個唱後入院接受微創手術，執走壓住張偉文神經線嘅軟骨，希望術後對偉文有幫助，有返腳力可以企返起身喺舞台唱歌。雖然最後有兩場個唱要延後，但手術如常上周進行。昨天Aman陪伴咗張偉文去覆診，醫生指張偉文手術成功，不過有待做物理治療強壯返啲下肢肌肉，才能嘗試步行。
Aman望大家集氣
昨天見張偉文清減咗，Aman指張偉文手腳冰冷，血氣唔夠，要給他補品。不過，張偉文卻顯得相當風騷，除拍晒手及豎起手指公為自己打氣外，不時展露開心笑容，仲好好唱口。Aman追問張偉文，做完微創手術有冇好轉呀？隻腳郁得有冇好啲呢？張偉文即點頭回應話有，更示範轉動雙腳腳踝說：「好返好多囉，再冇麻痺嘅感覺，不過，有時攰就會有啲麻。」Aman見偉文表現咁好都表示滿意及感動，更補充說：「佢真係好返好多，以前上落要托住佢對腳㗎，希望大家集氣畀偉文，同埋祝大家身體健康，新年快樂。」張偉文碌大雙眼不停笑住哼歌，幾年來難得有咁精靈。
立即下載 | 全新《星島頭條》APP :https://bit.ly/3yLrgYZ
_2.jpg)
|
鍾意就快D Share啦！
|
|
|