「靚聲王」張偉文早前確診新冠肺炎，被送往廣華醫院治理，有消息指至今留醫8日嘅張偉文病情轉差，連日來持續發燒，一邊肺部變花，而且血液含氧量低，要靠4部氧氣機幫助呼吸，並以類固醇進行治療，而其經理人好友方俊亦承認張偉文情況有惡化趨勢，甚至轉述醫生說話指「若果日後要以呼吸機維持生命，我唔建議令病人受苦」，表明情況不樂觀。
由於張偉文確診情況不樂觀，好友及監護人方俊坦言為他感到擔心：「都幫唔到，又唔夠膽唔講，有乜事又唔想隱瞞。」據他所知張偉文都算清醒，但思緒比較混亂，他說：「但係咪因為佢腦退化？大家都考究唔到，係好慘㗎，我覺得好無助，佢唔係少嘢，都應該幾大鑊。」
張偉文一生好坎坷
問是否已做定心理準備？他說：「冇話心唔心理備，萬一有乜都唔話好突然，因為凡事諗定最壞打算，接到壞消息時都唔會崩潰。」方俊又指張偉文一生好坎坷，於10歲大時爸爸就行船就走咗，15歲媽媽生癌死埋，一個人活到依家69歲，去到依家晚年得自己一個係好淒涼，他說：「冇親人，知心朋友又唔多，正所謂久病床前冇孝子，人情真係紙咁薄，佢有幾個朋友識咗好多年，有2個去探佢，嗰時疫情都未咁犀利，可以同佢落街食嘢，點知佢話唔見咗銀包，跟住嗰2個朋友就即刻話咁下次先食，使唔使現實到咁呀，食個茶餐廳啫，唔係要佢夾錢？」
方俊透露張偉文年初才做完腰部手術，又幫對方訂了場地開騷，他說：「諗住整好條腰，等佢可以生活得有質素少少，行得番，唔使依賴晒張輪椅，雖然係使咗好多錢，但佢對腳有番啲力，係好咗，仲諗住開始做物理治療，等對腳再好啲，點知就咁，真係好悲哀。」現在他唯一可以做的是日日打電話到醫院詢問對方的情況，可惜由朝打到夜都冇乜回覆，他無奈說：「佢哋都冇去面對人哋嘅需要。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|