馮允謙奉旨床上攬實Hillary 報復式浪漫講百句I Love You
馮允謙（Jay）新歌《報復式浪漫》邀請人氣女神劉沛蘅（Hillary）擔任女主角，要飾演熱戀中情侶，攞正牌瘋狂放閃！MV其中一幕，二人要在床上談情，Jay擔心被人覺得好咸濕，一度唔知將手放去邊，他說：「唔敢亂擺又怕摸錯地方，於是就放喺佢個頭上。」Hillary哈哈大笑說：「你係咁摷亂我個頭，每次Cut機都要執一次。」Hillary在MV裏飾演一名控制狂女友，不但鎖住Jay在屋企，還迫他穿情侶裝、手機殼、Wallpaper，甚至躲在床下底監視男友，非常誇張。
導演要求甚高，要Jay以不同層次向Hillary講「I Love You」，百厭的Hillary不停搖頭裝聾，要他講完又講。最初細細聲溫柔地在她耳邊講，然後愈講愈激動，最後做埋動作，大大小小的心形手勢都做齊，Hillary仍然甜笑不停搖頭，Jay拿她沒辦法，拳頭硬晒，還肉緊地捉住她手臂，全場爆笑。足足講了百次「I Love You」，二人笑言打破人生中，示愛和被示愛的紀錄。他們說：「無論有沒有情人，只要好想有Sweet嘅感覺，就可以日日重復睇呢個MV，睇我哋好變態咁互相用浪漫報復對方！」
問Jay為何邀請Hillary做MV女主角？他表示不用多說時，在旁的Hillary撒嬌：「講啦，講啦，我想聽呀！」他笑說：「我哋一早喺IG相識，第一次傳短訊畀佢時串錯佢英文名，好瘀，所以搵佢拍MV賠罪。」Hillary失望扁嘴。Jay認真地說：「睇佢個樣咁Sweet，就知好啱呢首歌其實我一直都好想同Hillary合作，後來知道原來我哋係同公司，所以就大膽要求請佢拍MV。」Hillary聞言心花怒放，說：「真係你要求搵我？好開心。我好鍾意你嘅歌，公司話我知同你拍MV，我勁開心！」還即時講出多首他的作品名，證明自己是鐵粉。而當Jay一人埋位時，Hillary就如小粉絲般用手機拍攝。
更多第5波疫情資訊，請到以下專頁瀏覽（按此）
立即下載｜全新《星島頭條》APP：https://bit.ly/3yLrgYZ
|
鍾意就快D Share啦！
|
|
|