頭條獨家丨郭子豪推劇遭雪藏學懂珍惜 曾因離地囂爆狂得罪人
郭子豪最近兩線劇《食腦喪B》和《今宵大廈2》都有份演出，各有難忘經驗，不過講到最大收獲肯定是因《食腦》而跟何廣沛和方紹聰組成「食腦三子」，再成立製作公司齊追夢。由模特兒轉戰電視圈7年的子豪，自爆由離地囂爆到經歷公司兩度雪藏後，更加清楚自己不足，感恩現在擁有的一切。
採訪：杜淑霞 攝影：沈健程
髮型：Hugo Poon
子豪跟何廣沛和方紹聰雖然性格和背景都不同，反而令他們能互補不足，跟劇中一樣組成這個鐵三角，他又笑指私底下三人關係，「我哋喺studio成日講廣沛係阿媽角色，我係阿爸，奶仔係個細路，我好多時諗到嘅嘢會比較心急，冇咗佢哋角色，我係搞唔掂，佢哋將我衝返嚟嘅嘢變成個落地嘅主意，翻繹返人話講畀啲同事聽，有時我要求好高對啲同事好燥，廣沛就好似潤滑劑咁。」他又透露除合作主持綜藝《真係唔好笑》外，還跟高層曾志偉提出創作新綜藝節目，「曾生都開咗綠燈，但內容未公佈得住，我哋三個都好期待。」
曾經心態醜惡
入行7年，子豪近期發展愈來愈好，但他卻自爆初入公司時有過勁乞人憎的日子，「做Model時真係好多粉絲，個人就囂，個鼻哥生咗喺額頭度，一路覺得自己讀書同外貌都唔差，就自我感覺良好，睇唔起人，嗰種心態好醜惡，入到TVB冇咁多人照顧，慢慢先學返點樣做人同處事，7年嚟都得罪咗好多人。」
子豪更自爆早在醉駕事件前，因推劇已被公司雪藏過，「做埋宣傳後，我無端端話唔拍，因我知同時間有另一個角色，但公司安排咗呢個，我覺得應該做嗰個，公司同我講嘅原因我聽唔入耳，但當人大咗，嗰兩套劇都出咗街，我就明點解當時要我做呢個角色。」
不過，雪藏確實令子豪成長，「嗰時醒咗六、七成，醉駕再醒埋嗰兩、三成，我𠵱家仲有一成不足。」自知不足的子豪，不斷讀戲劇和製作課程增值，考健身和各類車牌裝備自己，更加學懂珍惜所擁有，「公司畀好多機會，做演員係我鍾意做嘅嘢，又有搵到錢嘅嘢，一個咁差性格嘅人，身邊有啲friend同女朋友不離不棄，已經好幸福。」
更多第5波疫情資訊，請到以下專頁瀏覽（按此）
立即下載|全新《星島頭條》APP :https://bit.ly/3yLrgYZ
|
鍾意就快D Share啦！
|
|
|
