早前的一場演唱會因音響故障令earmon出現問題，不少粉絲非常擔心軒公的耳朵受損，他笑說：「炸完之後Wee咗一晚，不過唔緊要，依邊隻耳仔都壞壞哋，都唔爭在嗰下，當然會自己處理得小心啲。但冇辦法，同事都唔想。」他續指當晚出了一個IG限時動態，講述當晚的感受：「覺得唔開心係大家都畀咁多錢買飛入嚟，甚至乎有啲朋友想睇多場，我唔鼓勵大家買黃牛，都冇辦法買咗，我覺得每一晚都要喺個Standard…自己嗰晚狀態其實幾好，但因為音響問題，冇啦因為完美主義者嘅缺點。」
在眾多份的嘉賓禮物中，軒公說最深刻和感動的是Ivana的親筆信：「我哋真係太多回憶，走南闖北，有過好多次好驚險經歷。出嚟做騷真係咩人都見過，俾啲社團人士閂埋喺間房度，困住成晚都有，所以對佢嘅感情係唔同。」另一份令軒公同樣驚喜的還有Ian的模型車，他說小時後非常渴望擁有玩具車：「但細個屋企環境唔係咁好，所以好恨有嗰個size嘅鐵皮車，今晚攞出嚟嘅威力，同Ivana嘅嗰封信都有得揮。我又覺得幾廿歲喺個後生面前，we嘩鬼叫會嚇親人哋…佢份禮物係彌補咗我嘅童年缺失，所以我會將架車放喺睡房度。」
演唱會場場Encore，場場超時，軒公透露：「截至今日晏晝，今晚未計，罰款係過百萬，白做。」他笑言超時的時間足夠開多一至兩場演唱會，亦指有向老闆「跪玻璃」：「唔係蝕錢，但係一味咁罰。但老闆係一個好通透嘅人，佢話冇嘢緊要得過觀眾對你嘅支持。（冇扣你人工？）呢個佢又冇講，我就唔提啦呢啲位。今晚我其實想繼續唱落去，但冇辦法，紅館始終係政府轄下表演場地，同事受勞工法嘅保障，下次諗吓7點開騷，一收工就過嚟，喺門口買埋飯盒，遮遮飯盒。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
