BTS宣佈休團成員單飛發展 RM淚爆迷失方向SUGA冇晒創作樂趣
出道九周年的韓國天團「防彈少年團」（BTS）於上周五推出新專輯《Proof》，昨晚在官方YouTube頻道舉行「防彈聚餐」周年慶祝直播活動。
活動開始，各人飲住SAKE及紅酒邊飲邊食邊傾，見枱上有PIZZA、意粉及帝王蟹等，成員們起初笑住傾，Jin提到最近忙玩遊戲，一日玩足20個鐘，四日只食咗兩餐飯，雖然無乜瞓同食，但好開心。而JIMIN提到自己努力作曲同生活。不久前同PSY合作《That That》的SUGA就好忙，忙學英文、日文、結他、鍵盤、聲樂、跳舞及Pilates。
隊長RM一開始已好有感觸，講到有人問佢BTS十周年會做乜?「《ON》推出後想去環遊世界巡唱一年，去未去過嘅地方開Show，包括澳洲及印度，仲有巴塞隆那，已規畫行程路線，但之後有疫情取消咗，大家都好痛苦，就嘗試從未試過嘅單曲，好似《Dynamite》及《BUTTER》，仲有好少被提及《Life Goes On》，我好努力制作，覺得太可憐。」
眾人互問對方近況有啲奇怪，皆因彈仔一向住宿舍，之後RM自爆聚餐嘅地方就係宿舍，但宿舍合約已完結，眾人已搬離各自生活，七子共同生活10年，RM及SUGA更一齊生活咗13年，V仔及J-HOPE坦言好多回憶亦非常不捨。JIN提到去過JK屋企，發現對方成屋都係床墊，「客廳舖三個床墊，20個香薰爐，睡房有兩個床墊，我話:『喂，你瞓邊度?』佢話想幾時瞓就幾時瞓，所以周圍都有床墊。」
之後進入戲肉，SUGA提到BTS進入休團期，RM歎一口氣表示，「《ON》推出後唔知要做乜，用疫情做籍口，之後出咗《Dynamite》、《BUTTER》、《permission to dance》及《Life Goes On》，覺得團隊變咗，唔知道要傳遞咩訊息，IDOL呢個體系冇時間畀人成熟，要一直拍一直做，一早起身化妝整頭，我冇晒成長嘅時間，有好多想做嘅嘢，覺得辜負粉絲的期望。」
而SUGA亦大呻冇晒創作樂趣:「填詞好難，要不斷滿足聽眾需求，令我好痛苦，2013年開始創作，冇一次覺得係有趣，硬寫出嚟，但而家嘅絞盡腦汁同七、八年前嘅絞盡腦汁完全唔同，當時雖然唔純熟，但至少寫到想講嘅嘢，而家真係無話可說，唔知道講咩好。」另外SUGA又提到不斷學習就係想作出改變，「好似RAP，因為我擅長，所以一直做，但我想嘗試各種風格，做廣告音樂，做遊戲音槳，我有呢種諗法係因為如果我獨自一人演出，RAP足兩個鐘會好悶。」
V仔對於休團冷靜表示:「再次聚埋一齊嘅時候，效應會與眾不同，同以前一定唔一樣。」JK就話:「要成為比昨天更好嘅自己，所以嘗試唔同的事情，要同以前唔一樣。」
飲威士忌飲到有啲醉嘅JHOPE係第一個SOLO成員，佢強調SOLO音樂同防彈好唔同，作為防彈第二章非常重要。另外各成員都將陸續出SOLO，JK排在SUGA之後，JIN將會係最後一位出SOLO成員，估計佢要服完兵役後先會推出。
另外提到出席音樂放送節目，JIN說之前在韓國開SHOW，因為疫情，觀眾不能歡呼，由於太掛住韓國歌迷的歡呼聲，所以決定出席三個音樂放送活動，而防彈綜藝《Run BTS! 》亦會有限度繼續。
RM透露唔敢停下腳步休息，「擔心被大家討厭，好像犯了罪一樣.其他成員亦有同樣想法，所以我們從論峴洞小小的地方，走到了白宮，都寫進《Yet To Come》的歌詞，這個版本是我認為宇宙最好的版本。我依然想去做，守護想守護的東西，我們一齊真心站在舞台上，聚餐談論時，不需要任何規則，幸福地交談，幸福地做著我們能做的事，這就是我希望的」。RM講到一半忍唔住喊，柾國、SUGA、J-HOPE及JIMIN也忍不住流下眼淚。
忙內柾國為讓Fans安心，表示一定會回到大家身邊。「我們擁有各自的時間，也會累積多樣的經驗，更進一步成長，一定會回到大家身邊。我相信7個人一定會變得比現在更好，希望大家能為我們加油」。J-HOPE則說，「想對9年來一齊走過的成員們、粉絲們說聲謝謝。跟隊友談了很多，我覺得稍微分開一下，才會知道如何再次重組，這種時機很重要，希望大家不要想得太負面。」。SUGA附和，「我們不是要解散，只是暫時分開生活」。
最後七人舉杯慶祝，由柾國代表發言，「大家還有很長的人生，為了各自的人生，為了我們乾杯。」為9周年聚餐畫下句號。
星島新聞集團慶回歸25周年專題網站，請即瀏覽
立即下載 | 全新《星島頭條》APP : https://bit.ly/3yLrgYZ
|
鍾意就快D Share啦！
|
|
|