獨家丨包曉華否認私吞帛金焫着四太 兩房聯手反擊怒轟劉雅麗母女大話連篇
今年3月，劉雅麗父親劉山本因新冠肺炎離世，之後爆出三房人嘅家庭糾紛，大房女婿方錦培不滿第三房嘅劉雅麗及母親包曉華私吞帛金，又拒絕到醫院見父親最後一面及領回遺體而向本報爆料。上周劉母現身港台節目，否認私吞帛金更反插「嗰個女人」(四太Eva)從中作梗，令家事再度發酵。四太忍無可忍，首度現身接受《星島頭條》獨家訪問，終極踼爆母女二人大話連篇。對於四太Eva指控，劉雅麗表示「一律唔回應及冇嘢講。」採訪：娛樂組
因為劉雅麗喺本叔出殯當日「衰多口」發表「感激論」提及劉德華，激嬲有單有據，一手包辦200多萬醫藥費及殮葬的大房女婿方錦培。事件曝光後劉雅麗不想回應家事，但就堅稱有份夾殮葬費。以為事件已Close File，不過包曉華日前喺電台節目聲稱已交出7萬蚊帛金，唔計失聯嘅二房兩母女，強調7個仔女分擔近20萬嘅殮葬費乜都夠晒數，同時又澄清有提出去醫院見本叔最後一面及去領遺體，只是遭嗰個女人(四太)阻撓。
冇血緣唔見最後一面
上周五，本叔四太Eva、唔願出鏡嘅大房3女Winnie及大房3女女婿方錦培，接受《星島頭條》訪問聯手踢爆劉雅麗母女大話連篇。Winnie在場力證：「本叔由十字車送到醫院時證實已離世，醫生一定會畀家人去見死者最後一面，但我打畀佢(包曉華)時，佢竟然話『死咗仲有乜好睇？』」至於領遺體問題，方錦培指唔會係實名制，幾多個人去都得，Eva展示跟包曉華whatsapp對話截圖，指本叔4月3號上山，4月4號包曉華自揭劉雅麗唔係本叔親女唔領骨灰，所以大家明晒，佢哋唔去見最後一面，係因為冇血緣加冇感情。
劉母每次食飯都攞錢
Eva不屑兩母女行為：「兩母女太自私，佛口但蛇心，包曉華明知大太太喺澳門明媒正娶，仲『挾持』本叔重婚，有好嘢就係老婆，本叔患病最後一年睇都冇睇過佢，連電話問候都冇個呀！對於包曉華口中話，本叔問劉雅麗『借』咗200萬嚟醫病，但冇力償還唔好意思再打攪佢哋，如果係有負責醫藥費就交出單據，我眼見每次出親嚟食飯，包曉華就問本叔攞錢，嘈到本叔食食吓飯都要走。唉！本叔都幾十歲啦，個『哎吔女』應該孝敬返佢。」
只交出3萬5帛金
提到包曉華口口聲聲話已付7萬蚊帛金，Eva聽完火都嚟埋，即爆佢有私吞帛金：「佢係交咗3萬5蚊畀方錦培，係本叔朋友交低，畀本叔做白事，包曉華承諾收齊帛金再交出。4月2號晚佢交咗一袋當日(設靈)收到嘅帛金畀方錦培，點算大概有3萬5蚊。」方錦培親述3號上山當日，包曉華未到前，由他接待安德尊兼收咗封帛金、連同當日親友嘅帛金，包曉華統統再冇交出嚟：「點解咁記得安德尊封帛金?因為我收完就放咗入接待處嘅枱入面，當時由包曉華朋友負責坐喺度睇住。包曉華當咗2號交出嗰3萬5蚊係自己出，其實係當日親友帛金數目嘅總和，而且有咁多親友嚟過，你信唔信嗰日得咁少？」
方錦培愈講愈嬲，「Eva個女都親眼見到佢攞走咗一啲帛金啦，帛金係畀死人㗎，不過，Eva就話費事嘈。𠵱家本叔都未夠錢買骨灰龕，唯有由我畀錢，但我哋唔會透露安放本叔喺邊，係佢自己話唔領骨灰。」外傳包曉華近日四出搵親友借錢，數目由1萬至3萬不等，Eva及方錦培對此不置可否：「佢借到係佢本事，唔關我哋事，佢唔好『消費』本叔話同佢有關。」
星島新聞集團慶回歸25周年專題網站，請即瀏覽
立即下載 | 全新《星島頭條》APP : https://bit.ly/3yLrgYZ
|
鍾意就快D Share啦！
|
|
|