藝人陳百祥（阿叻）今午（15日）出席《善心滿載仁愛堂》記者會。他曾事先張揚這是自己主持的最後一個大騷，不過接受訪問時他主動爆自己「出爾反爾」：「因為要畀面曾志偉。我一講最後一個騷，即刻十萬九千個電話打嚟問，志偉叫我畀機會佢，所以我諗點都要再做多一、兩個。坦白講，08年金融風暴嘅時候，佢終止咗自己嘅定期存款，攞咗8、9位數字存款借畀我渡過難關。（你不嬲好有錢喎。）我呢啲只係三更窮五更富，當然我1、2星期就還清晒畀佢，咁我都仲有啲本事嘅。（佢有冇收你利息？）我都唔好意思唔畀」
阿叻感恩表示自己一世夠運，相識滿天下：「志偉同阿倫（譚詠麟）都借過錢畀我。當年阿倫借3萬蚊畀我，已經係買港島區豪宅嘅首期，佢仲要瞞住屋企人。我可以夠膽咁講，一年內我搵朋友食飯，一定有365個肯陪我，真係識人好過識字。」今次節目內，阿叻由中西樂伴奏唱抒情歌：「以前我都試過喺籌款節目同我老婆合唱粵曲，咁我都好少着呢類型歌，所以今次有啲難度。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
