吳幸美19歲成落選港姐 21歲為供養父母搏命做主持《東張》飲斷片酒
2003年港姐出身的吳幸美落選後加入TVB，在2009年開始任《東張西望》外景主持兼擔任主播，期間有參與劇集和大型綜藝節目主持工作，發展尚算不過良好，直到近期因為參加《好聲好戲》第二季，她神還原蔡少芬在《棟篤神探》以及李佳芯《 智能愛人 》的演出，結果獲得一致讚好，資深粵語配音員梁少霞忍不住說：「我覺得妳係畀老鼠同曱甴耽誤咗。」連網民亦戥她高興，覺得她終於被人認識。
對於大家的讚賞，幸美今日接受《頭條日報》的訪問，雖然過往試過為節目任旁白，不過配音都是第一次：「觀眾最認識我，一定係做《東張》嘅主持或者係主播，今次真係一個全新嘗試，仲學識咗好多配音嘅技能，點樣用把聲去做好一個角色，呢個節目真係好好，可以發掘藝員同事嘅潛質。」幸美還稱當初只是抱着學習心態，從沒有想過會有這麼大的迴響：「公司真係好好，製作咗好多唔同類型嘅節目，我自己都希望可以參加，等觀眾可以知道我有唔同嘅一面。」
自從節目出街後，不少網民留言讚幸美終於被賞識，她坦言自己有留意每一個留言：「真係好感動，有啲仲睇到眼濕濕，好多謝大家認同我嘅努力，估唔到反應係咁好。」至於獲梁少霞的讚賞，幸美笑說：「梁老師用有趣嘅方法去講，成件事係好得意，大家睇完都會哈哈大笑，節目嘅效果最緊要係令觀眾睇得開心，當然喺我自己嚟講，都好多謝《東張》，因為呢個節目令到觀眾認識我，知道就算身處喺邊一個崗位都無畏無懼，所以我覺得用呢個咁得意嘅形容詞嚟形容我都幾好呀！」
當年幸美參選港姐時只有19歲，不過父母給予百份百支持，讓她停學參選兼允許女兒加入娛樂圈工作，為了報答父養育之恩，幸美21歲擔起養家的責任，努力工作，從不放棄任何一個工作機會，試過一星期工作7天，2至3日不睡覺不停工作更是閒事。除了主持工作外，幸美本身很喜歡唱歌，曾被當時麥浚龍的公司睇中，想簽她做歌手，但幾經考慮，最後決定放棄，專注向主持和演員方向發展，不過閒時依然會唱歌，2016年有幸獲向雪懷賞識，為其紅館演唱會擔任嘉賓，一圓歌手夢。
幸美從2009年開始任《東張西望》外景主持兼主播，曾因訪問「睇住啊」大叔成為網絡熱話，又試過親身上陣試斷片酒，雖然她本身不飲酒，不過仍然硬着頭皮頂住上，最後醉了要同事送她回家，後來贏得「測試專員」的稱呼。近年搖身一變成為正義女神， 試過去藍田採訪半天吊男童的公公、又去過將軍澳屋邨追訪在公園自瀆怪叔叔、幸美覺得既然公司給她這機會，作為藝人又何妨一事試？可惜幸美的爸爸在2019年年病逝， 令到她覺得因未能讓爸爸享福而感到遺憾，所以她更加要多花時間陪伴媽媽，這是她對爸爸的承諾。
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
|
鍾意就快D Share啦！
|
|
|