2022年9月7日星期三

獨家丨黃凱芹再開紅館騷被MIRROR慘劇嚇親半夜扎醒:成腦意外畫面真係好驚 #MIRROR #黃凱芹

獨家丨黃凱芹再開紅館騷被MIRROR慘劇嚇親半夜扎醒:成腦意外畫面真係好驚

昔日嘅「情歌王子」黃凱芹（Chris）經已「登六」，月前由加拿大返港，為本月17日再登紅館舉行《細聽．黃凱芹35週年演唱會》做準備。由於MIRROR演唱會發生嚴重意外，Chris坦言有好大心理陰影，甚至半夜扎醒，成腦都係驚嚇畫面。另外，Chris的私生活一向低調，不過今次就向《頭條娛樂》首次披露家庭狀況及跟「玉女掌門人」周慧敏的CP之謎。採訪：方騫平攝影：朱偉彥頭髮：Paul Chow at i i hair salon landmark 化粧：keikei 場地：The AIR (The ONE)

Chris闊別紅館舞台10年，期間5次入紙申請被拒。



Chris闊別紅館舞台10年後再開騷，期間先後5次入紙申請都被拒，最終在入行35周年前得知終有檔期，覺得好有意義，更形容如同中到公屋大單位咁，Old School得嚟都幾好笑！但由於發生MIRROR演唱會事故，佢都幾提心吊膽。但事先張揚個騷會好精彩，唱盡所有熱門及冷門歌曲共40幾首，不過，特別提示觀眾唔好帶燈牌入場，以免射親喺舞台角落做緊嘢嘅工作人員出意外。



Chris對MIRROR演唱會發生嚴重事故覺得好不安，開Show都提心吊膽。



10年前紅館Show，Chris同dancer激吻。



因為等唔到紅館，去年Chris於戲曲中心大劇院開show。



只開一場。

意外畫面全入晒腦

雖然Chris唔太熟識MIRROR，但睇完意外片段都嚇親：「呢件不幸嘅事對所有舞台演出者嚟講都係一個陰影，我睇完都嚇咗一跳，個畫面真係好驚嚇，半夜瞓醒只係得呢個畫面，會一直問：『點解會咁嘅？』呢個畫面成日喺我腦入面，真係好驚，作為表演者、舞蹈員，甚至觀眾，頭頂冇可能冇燈槽，唔好話大到600KG電視屏幕，就算跌一粒螺絲後果都好嚴重，所以到時都會不時抬頭望，只希望當晚參與嘅表演者、觀眾及意外傷者盡快康復，吉人天相。」



因為MIRROR演唱會嚴重事故，Chris坦言好大心理陰影。

歌壇玩法已唔同晒

問到如何克服心理障礙？Chris話盡量放開懷抱，唔好自己嚇自己：「只能交由專業團隊處理，啲人話最危險嘅時候，大家警剔性會最高。」Chris曾踩過4次紅館台板，見到有危險位就要提出，所以過往喺舞台上最多發生過忘記拉褲鍊及爆呔等瘀事：「可能MIRROR比較年青，除咗冇乜舞台經驗，亦冇乜話語權。」



2004年Chris紅館個唱，擔任表演嘉賓嘅黃伊汶在台上跟他玩「女上男下」。



早喺20年前，Chris經已喺演唱會中晒肌。

Chris又表示無意再戰樂壇：「去到咁嘅年紀，我又唔係為名為利，只係喺能力範圍內，滿足吓自己，我隨時可以放低。」他指時下唱歌玩法同以前唔同晒，經已變咗質，他不吐不快：「除咗傳媒操守唔同咗，𠵱家要買節目時段及免費做音樂會先肯播歌。」



1988年，Chris同「玉女」柏安妮合作做港台節目《聽歌學英文》。



11年前，Chris從加拿大回港後跟忠粉聚會。

同周慧敏電郵聯絡

提到黃凱芹曾為周慧敏度身創作情歌《情未了》，多年來流傳Chris最愛周慧敏，Chris冇否定：「當時邊個唔鍾意佢？我同佢喺舞台上，的確係非常好嘅最佳拍檔，無可厚非鍾意同佢喺舞台上合作，咁算唔算係緣份呢？而且我哋識於微時，大家經歷一樣係資深朋友。」由於Chris只會用Email跟外界溝通，所以周慧敏一直用此方法聯絡他：「佢成日同我分享以前啲短劇舊片，但我都好少睇返，偶然睇到就睇吓。」另外，對於他的神秘家庭狀況？Chris形容自己並非處於金魚缸，畀大家睇住佢點游嘅藝人：「所以冇乜好講，我咪人一個，冇乜特別，學習過啲開心生活。」