MIRROR演唱會丨So Ching信男友一定會好番 舞蹈員群起促主辦方交代
MIRROR演唱會意外發生至今兩個月，最終責任仍未有定案，有待調查報告結果，而受傷舞蹈員阿Mo（李啟言）仍然在醫院留醫。事隔兩個月，有多位有份參與當日表演的舞蹈員，均紛紛以長文抒發感受，並坦言對紅館的天花充滿恐懼，更促請有關部門盡快交代事件。女友So Ching亦在IG限時動態留言：「兩個月喇，我望住你，我知道我哋冇其他選擇，你一定會好番！」
與阿Mo感情要好的舞蹈員方方表示從來冇想過會害怕紅館這個地方，更感觸的說：「呢兩個月，佢每日見到嘅畫面淨係天花板。往後有一段好長嘅時間，佢嘅視線都只有天花板。一個平常人都末必能夠接受，何況係我咁貪靚跳舞咁叻嘅朋友。呢個災難，對佢嘅生活帶嚟摧毁性轉變，佢自己同佢身邊嘅人都好叻，每一日都調整自己心態去面對，佢哋根本唔應該要面對嘅現實。我個心好痛好痛，好多疑問，點解我朋友要受呢啲苦，我好掛住好掛住佢。」方方同樣促請主辦方給予阿Mo交代：「一個交代好難嗎？一句誠想嘅公開道歉好難嗎？希望呢個地方仍然能夠容納希望，希望呢個地方仍然能夠彰顯公義。」
舞蹈員Canny透露與阿Mo識於微時，並親眼目睹意外發生經過，她寫道：「一聲巨響，我回望，看到我身後的好朋友倒下了，躺下來了，動不了......距離很近，他的臉孔很清晰，印在我腦海中。我們這些年來的努力，就在這短短數秒間，都被一一摧毁了。紅館的台底、走廊、化妝間一片悲鳴、嚎哭......這個惡夢為我帶來了一個揮之不去的陰影。」她表示意外至今一直沒有得到一個合理的解釋，並會繼續為阿Mo 追討應有的公道。她更心痛阿Mo家人和女友So Ching表示：「難以想像他本人、家人、女朋友，內心承受的一定比我煎熬千倍萬倍。置身處地去想，身體髮膚受之父母，看到李媽媽很努力面對，我也十分不忍心。而每天頻頻撲撲照顧他日常的So Ching，這個二十幾歲、本是對生活充滿熱誠和抱有夢想的小女孩，我更是深感愧疚。」
另一舞蹈員Zisac 則表示如果再有機會重踏紅館跳舞，或只會不停擔天望地，深怕上面幾時會有嘢跌落嚟：「兩個月了，啟言仲係醫院，先唔講再上台，希望變返之前咁嘅身體狀態都要祈求奇蹟。啟言身體需要好多時間，咁調查同交代需要幾多時間？我哋等緊一份報告，等緊一個交代」
【其他閱讀】：
MIRROR演唱會丨So Ching着男友衣服解思念之苦 阿Mo能自主呼吸4周後除頸箍
MIRROR演唱會丨張梓峯自責救唔到阿Mo想道歉 意外創傷令壓力倍增
MIRROR演唱會丨父透露阿Mo未能自主咳嗽 進食有機會落錯格致肺炎
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
|
鍾意就快D Share啦！
|
|
|
