獨家丨丁子朗用真身同網民一齊鬧「渣男進」 向葉念琛自薦做男版「阿寶」
一向形象健康兼演開乖乖仔的丁子朗，在《美麗戰場》首度演繹極品渣男「阿進」，最初丁丁都冇自信演到，但後來已接受，面對網上負評更由唔開心變齊齊鬧。演完渣男自信大增的他，更直言要向葉念琛自薦做男版「阿寶」。採訪：杜杜 攝影：羅安強
因為丁子朗無信心演得好「渣男進」，葉念琛同佢由黃昏6點傾到凌晨12點，出盡力去說服，到現在他聽到有人叫渣男竟然好興奮，「渣男成為我代名詞，我係渣男，哈哈！」丁丁多謝觀眾投入角色，不過承認最初睇到網民留言鬧佢唔開心，但之後用真身鬧埋一份，「又話我油膩，又話我係『普信男』，即係咁普通但好有自信，點會追到陳曉華，但睇得多又覺得幾好睇幾好笑，𠵱家上咗癮係咁睇留言，仲會用自己account覆，仲幫手鬧埋一份，令到我同網民嘅關係拉近咗，好開心。」
好驚打傷陳曉華耳仔
講到虐打陳曉華，丁丁坦承相當難演，最怕整傷對方，「Hera塊面真係異常地細，我對手係可以包晒佢成個人頭，好驚一摑就會打中佢耳仔，對耳膜有影響，辛苦晒陳曉華，爭佢好多餐飯。」丁丁劇透再遇「小美」一幕其實更難演，「我會以全新形象返嚟，再做一啲更不堪嘅事，係一個大反轉，嗰場都好大壓力，又係驚整親佢，會有少少動作場面，要瞓喺條路難控制啲，大家值得期待。」
丁丁直言演完「渣男」已冇有怕，更有信心挑戰更多不同角色，特別恨演「鍾家寶」這類轉變極大的角色，「等我問吓導演開唔開男版『阿寶』，我自薦做！」角色成功彈出，丁丁有信心再獲提名「飛躍進步男藝員」，「今年唔係演技上嘅飛躍，係角色上嘅飛躍，試咗唔同嘅新嘢，年頭有《青春不要臉》，對我係好大挑戰，做戲嚟講好大轉捩點，加上《美麗戰場》嘅渣男，如果提名多次『飛躍』都有信心嘅。」
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
|
鍾意就快D Share啦！
|
|
|
