2022年11月3日星期四

獨家丨劉家聰腦瘤影響手腳靈活無阻修讀中醫學位死過翻生想演好戲台慶攞獎 #劉家聰 #台慶

獨家丨劉家聰腦瘤影響手腳靈活無阻修讀中醫學位死過翻生想演好戲台慶攞獎

44歲TVB藝員劉家聰參加台慶節目《全城一叮》，分享2017年尾切除6CM大腦腫瘤後，曾半身癱瘓的親身經歷，嘉賓評判馮盈盈亦被感動到狂喊。面對大病，家聰並冇自怨自艾，反而抱積極態度面對人生，他笑住說：「係畀機會我放下做個平凡人。」自此家聰性格亦改變，學識放慢腳步好好享受，以往工作時最常見的忟憎亦消失。他最想用豐富的人生經歷，發揮於演技上，引起共鳴，將來有機會在台慶獲得獎項。採訪：方騫平攝影：羅安強場地：三軍會

劉家聰雙腳未完全康復，走路仍然有點拐。



家聰因腦內生咗個6CM腫瘤，需接受長達7小時大手術。



劉家聰喺《全城一叮》表演影子舞，表達「家聰係得㗎！」



家聰活在當下。



家聰接受大手術後個人平和晒。



劉家聰相約《星島頭條》記者到他的「第二個家」做訪問。

「生命鬥士」劉家聰相約《頭條日報》記者到他的「第二個家」做訪問，原來術後他經常到該會所游水、溫書、甚至睇風景，過住平凡人生活。家聰透露每年的覆診報告，醫生都以「靚仔」形容，算係叫大病痊癒，但因為腫瘤位置影響到行動區，目前行路都會拐吓拐吓，手部活動亦冇正常人咁靈活，所以《全城一叮》中表演手影及沙畫，要花足兩星期日以繼夜練習。



節目中家聰分享逆境求生真實人生故事，但總算可以重回舞台。



由家聰嘅勵志人生經歷及超強意志，感動到馮盈盈做咗喊包。



家聰用兩周學畫沙畫。



家聰用公司「全力以赴做到最好」作為人生口號。



手術後家聰喺囡囡陪伴下努力游水做物理治療，過程艱苦。

大手術後個人平和晒

唔煙唔酒熱愛做運動的家聰，2017年尾任職有線電視娛樂新聞台主播，由於每日返工愈嚟愈攰，加上腳力變差，行得好辛苦，諱疾忌醫一排終於面對現實睇醫生：「感恩醫生用溫和態度講解病情，所以畀信心佢醫我，安排喺10日後開刀，仲記得醫生叫我乜都唔使準備，惟一術前要食好啲，我仲食埋個自助餐先入院。」



家聰冇擔心醫唔好。



手術前醫生只叫他食多啲好嘢。

直至做完7個小時大手術清醒過後，家聰有重生感覺：「我喺病牀上第一個五感係『點解世界唔同咗？點解突然咁平靜，啲嘢咁慢？多咗咁多色彩嘅？』原來係畀機會我放慢腳步，睇嘢細緻咗係開心㗎，可以享受過程，細味每一樣嘢，亦冇咗以前做採訪時嘅忟憎。」當時家聰相信靠意志一定行得返：「其實要多謝TVB，做藝人冬天跳海，夏天拍古裝，瞓埋棺材，我哋乜都捱過，就算冇錢開飯都捱到，只要放下，面對就可以。」最後家聰唔想半夜驚動家人照顧他去廁所，一個月後迫到自己企返起身行路：「𠵱家我都唔擔心雙腳會唔會再有好轉，因為呢個只係皮囊，最重要係內在。」



手術後清減不少的家聰戴着帽賀壽，寶貝女喺身邊特別好笑容。



節目中家聰的15歲囡囡上台為爸爸「授勳」，此環節事先並冇同阿Bob夾過。



家聰喺《全城一叮》決賽中表演沙畫，其實畫出家聰夢想的畫面！



常拍劇嘅家聰指自己乜都捱得過。



家聰就算行動不便仍堅持拍戲賺錢，新劇《下流上車族》中演「車總」之父。



家聰拍《愛回家》。

經歷豐富變「老火湯」

因為多咗好多人生經歷，家聰形容自己變成「老火湯」，內裡有最濃縮湯料，個人愈來愈成熟：「男人係要有經歷先可以成長，𠵱家我乜嘢都可以演到，唔係得個空殼，所以要爭取自己嘅舞台，希望觀眾可以感受得到我嘅故事，從而引起共鳴。我嘅人生目標除咗培育囡囡做有智慧嘅人外，仲好恨攞到台慶獎項，但求有獎，乜獎都得，新人獎都得…」至於經濟狀況，雖然要供樓，但家聰用OK嚟形容：「我好細個就努力尋找工作機會，唔會令自己咁坎坷，都要畀掌聲自己。」目前家聰仲讀緊港大6年制中醫學位，除咗尋求更多知識，最想學以致用，固本培元。