快樂的定義，因人而異。
不過，普遍來說，有獎品，大多可給人一點快樂，有獎金更佳。
對四十六歲的陳山聰來說，物質，確實曾令他快樂。
「以前，我會以為物質、名利，對我嚟講係最重要嘅，所以會好努力去追逐，但係o依家我先明白，內心嘅快樂、滿足，先至係最實在。
「以前嘅我，冇家庭觀念，甚至冇諗過生小朋友，o依家結咗婚，Jaco（其子陳霆軒）都兩歲幾嘞，我就會覺得，我嘅人生入面，最重要係太太同阿仔，係佢哋令我明白，我最快樂嘅階段，就係當下。」
手中把玩着玩具球，內心則餘裕滿滿，現在的陳山聰，對獎品、獎盃，更能以平常心對待，TVB的頒獎禮將至，他以熱門姿態，獲得三個角逐「視帝」的提名，網民還指，今年的「視帝」，是他跟林敏驄的「驄聰之爭」。
「作為演員，由負評到正評，已經係難事，再難啲，係要有人支持，你問我想唔想攞『視帝』，我會話，我有心理準備攞唔到，有冇獎唔重要，重要嘅係，觀眾鍾意睇陳山聰演嘅戲。」
其實，貪心一點，快樂跟獎盃，Why not both?
大熱
連同剛播畢的劇集《超能使者》，陳山聰今年有六部主演的作品先後播出，當中他於《美麗戰場》中的演出，更被指表現亮眼，有力跟林敏驄硬撼，衝擊「視帝」榮譽。
當事人聞言，即隨口笑言：「哈哈！講呢啲！」旋即正經八百地說：「大家見到陳山聰，由低潮走到今時今日，都差唔多有十年時間，可以話見證住我嘅成長，事業慢慢向上，同埋對演戲嘅誠意。得到觀眾嘅認同，我係最開心嘅，至於攞唔攞到獎，就喺我嘅控制範圍以外，而且好多前輩都演得好好，我有提名，成績已經係見得人。」
說他佛系，他直認不諱，「年輕啲嘅時候，有邊個唔想攞獎、唔想上位？而我o依家對獎項嘅睇法，已經改變咗，事業上，o依家嘅我都算穩定，亦都唔會因為獎項而唔開心，有係Bonus，冇我都係會繼續努力。以前因為名利，我會好唔開心，睇番轉頭，我會覺得自己好儍。
「經歷咗咁多，我更加明白娛樂圈花無百日紅，我今年有六套劇，出年可能得一套，咁我會唔會唔開心？梗係唔會而且我仲好慶幸，自己係一步一步嚟，早排見到有網友留言話，以前唔鍾意睇陳山聰，覺得我演戲麻麻，但睇咗《美麗戰場》，就覺得我有好大嘅進步，咁我已經好開心。」
剛播畢的《超能使者》，他飾演的「膠勇」（高勇），帶鄉音的特色甚為搶鏡，也為他帶來一個「最佳男配角」的提名。
九三年入行的陳山聰，於九二年參加模仿四大天王的歌唱比賽，獲得劉德華賞識，一晃眼便三十年，而昔日的參賽者，現已獨當一面。
一八年，他憑《同盟》獲得「最佳男配角」一獎，今年則獲十五項提名角逐獎項，單是「視帝」一項，已獲三個提名。
|
鍾意就快D Share啦！
|
|
|
