樂易玲今日（15日）出席百萬行活動時，表示張振朗昨晚（14日）拍攝新劇《奪命提示》時，眉骨被座地燈撞中，即時血如泉湧，即急送入私家醫院，當時張振朗仍保持清醒。由於傷口很深，為安全起見，無綫助理總經理（藝員管理及發展）樂易玲隨即安排他到九龍法國醫院治療，由相熟整容醫生縫7針。
已回家休息的振朗，接受電話訪問時聲音洪亮，精神狀態不俗，他表示：「做完手術冇大礙，要休息一下，當時拍緊動作戲，都做足安全措施，着晒護肘、護腕，有武指在場指導，冇諗到會發生意外，被一盞包咗膠嘅座地燈撼落頭，我又做番『地獄黑仔王』。」問到可擔心毀容？他笑言不怕：「男人有撻瘌幾好呀，型啲嘛。（縫了多少針？）7針。」女友楊偲泳很擔心？他表示沒有即時告知屋企人和朋友，以免身邊人擔心。
振朗的傷口除有縫針疤痕外，亦見紅腫，他說只是皮外傷，故毋須做腦部掃描，自言視力及智力沒受損，一切正常，他感謝監製和樂小姐安排醫生令他安心，跟今次劇組合作很開心：「我之前一直都想拍有少少動作嘅戲，希望可以盡快康復復工，唔影響拍攝進度。」樂易玲透露振朗本月21號拆線，最快都過年後才開工。
劇集監製文偉鴻受訪時，透露今早凌晨時份拍攝一場動作戲，講述張振朗、丁子朗、劉穎鏇及郭柏妍捉犯，期間振朗被道具燈擊中，劇組即送他到私家醫院，經整容醫生為他縫針，預計一星期後拆線，現時留家休息。至於其戲份將跳拍：「劇入面有三條主線，分別係陳山聰同劉佩玥、振朗同劉穎鏇、子朗同郭柏妍，所以呢段時間就山聰同子朗條線辛苦啲頂住先盡量畀振朗休息足啲先！」
而目擊張振朗「中頭獎」嘅劉穎鏇，表示當時拍攝緊大家同武指對打嘅場面，指雖然自己未有目睹對方撞頭一刻，不過見張振朗受傷後即按住雙眼，令她驚慌失措：「擔心佢呀！初頭以為佢係整親隻眼，仲驚啦，但原來係近額頭位。如果能夠拍多啲我做主嘅戲，等佢可以休息多啲，我梗係唔介意啦。希望佢可以有足夠嘅時間去抖，Ready嘅時候先開工，我都無所謂。」
陳山聰：「有咩話頂唔頂，我哋呢啲團隊精神嚟，都唔想邊個有事，淨係希望阿朗早日康復，好好休息，好好保重身體，之後拍攝順順利利！有咩等我哋搞住先，有咩問題吖，都係要拍㗎嘛，有乜邊個頂邊個。依家咪仲好，我哋嗱嗱聲拍多啲，後面佢辛苦啲，無乜所謂。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|