獨家丨黎耀祥確診聲沙睇好林敏驄拎視帝 老婆睇《輕‧功》太入戲晚晚睇到喊
黎耀祥在劇集《輕‧功》中飾演較真實年齡大的退休武師，要承受老伴離世的悲痛。58歲的祥哥唔忌諱，坦言似預演人生下半場，又指老婆梁耀蓮（Julia）晚晚睇到喊，更跟他說：「畀你早走喇，因為將來得返你一個人會好慘。」戲裏戲外都有幾個貨櫃嘅洋蔥。另外，提到即將舉行的台慶頒獎禮，祥哥睇好林敏驄，讚他「估唔到咁有驚喜。」採訪：方騫平
現身在內地工作的黎耀祥接受《頭條日報》訪問時唔止聲沙沙，唞氣聲仲好大，原來日前確診新冠肺炎，仲傳染埋老婆，兩公婆現正隔離休息中，祥哥報平安表示病況向好，冇發燒，只係喉嚨發炎好痛，仲不停咳嗽，中招頭兩日開唔到聲，一開返聲即做訪問，十分專業。
預演人生下半場
黎耀祥𠵱家一年返TVB拍一套劇，繼《殺手》、《拳王》後，他幾鍾意《輕‧功》呢類平實題材，會觸動到觀眾：「我老婆睇見我喺劇中喪偶(龔慈恩)，晚晚喺度喊，感受到將來自己走咗，原來剩低個老伴係會咁樣，佢會觸景傷情，會睹物思人，呢啲情節好真實，拍攝時都覺得好似預演人生下半場，我睇返呢啲場口都會喊。」祥哥坦言兩公婆都會傾到生死問題：「太太話我個人太被動冇乜朋友，擔心我會好悶好孤獨，佢反而識得照顧自己，搵到生活樂趣，所以願意畀我早走。」不過，兩公婆暫冇預先安排平安紙及長生位等，他語帶輕鬆說：「呢啲到時先算啦，既然都走咗咯，一把火燒咗佢，掉咗佢咪算囉。」
祥哥人到中年，現在一切隨遇而安，抱住輕鬆自在、唔強求嘅心態最舒服：「我好感恩，歷史上邊有藝人去到40幾歲先做男一？𠵱家去到50幾歲，不論經濟、演出、家庭上每個層面都合格，講真咁多年即使做配角及主角，心態上都冇乜分別，我覺得自己要有自己嘅人生態度，演戲之餘要有人生長遠計劃，現階段唔係年輕搏殺時期，唔會係咁横衝直撞乜都做，反而會珍惜時間及工作量，希望做好唔同嘅工作。」
冇信心四奪視帝
提到《輕‧功》得到年長及為人仔女嘅觀眾共鳴，作為三屆「視帝」的黎耀祥可有期望再奪殊榮？他表示睇好《下流上車族》的「車總」林敏驄，「呢啲咁平實嘅題材唔啱爭奪視帝，老實講，每位對手做咗咁多年戲，個個都演得好好，問題係演到乜角色，林敏驄個角色咁有驚喜，觀眾喜出望外，係奪獎因素，加上林敏驄平日咁『無厘頭』，估唔到佢拍認真戲，拿揑得咁好，令人感動，呢部份值得加分。 另外角色做得好同時，話題設定都要好，《下流》講房屋問題，大家會有共鳴，所以一定睇重佢。至於視后十強表現比較平均，如果講功力鮑姐(鮑起靜)、江儀儀冇得輸，而新一代演員有佢哋近一代嘅演出方法。」
《星島頭條》APP經已推出最新版本，請立即更新，瀏覽更精彩內容：http://www.stheadline.com/
|
鍾意就快D Share啦！
|
|
|
