獨家丨吳偉豪獲飛躍獎全靠周嘉洛 娛圈壓力超大有家人撐先頂得住
24歲，剛奪得「飛躍進步男藝員」的吳偉豪（Ricco），在《有種好男人》演40歲李佳芯（Ali）囝囝完全冇違和感，他賣口乖解釋容易投入角色，全因家有靚媽。講到家人，Ricco坦承是自己最強後盾，而《愛·回家之開心速遞》的「家人」劉丹及周嘉洛等，亦成為鞭策他進步的推手。採訪：杜杜 攝影：Stanley 髮型及化妝:Ricco Ng 服裝:dunhill 場地:Velo Italian Bar & Grill
Ricco跟Ali年齡只差16歲，但演起母子一樣神似，他識做話：「首先我媽咪都係非常之靚，所以唔難投入角色㗎！因為屋企已經有一個。」他承認現實中與媽咪相處方式跟角色一樣，「同朋友傾偈咁樣。」
愛搵二哥做「樹窿」
講到得獎，Ricco認為可能跟去年在《愛·回家》及《回歸》演出都有不俗迴響有關。由7年前入行到踏上頒獎台，Ricco覺得家人扮演最重要角色，「無論面對壓力或者任何負面嘅嘢，屋企人係我最強嘅後盾，所以我先可以承受到喺呢行嘅壓力，最重要多謝屋企人，無論條路幾難行都好，佢哋都唔停支持我、鼓勵我，叫我去努力做好份工。」而當中大他一年的二哥更成為他的主力「樹窿」，皆因成長階段主要同二哥一齊。
至於由Ricco入行已參與的《愛·回家》系列，亦成為他另一個家，有歸屬感外，向來對演出高要求的他，更會邀請一班《愛·回家》拍檔擔任其演出的意見調查團成員，特別是老死周嘉洛，「我次次有劇出都會問佢『你覺得點呀』，佢有劇出我又會同佢講返。」連前輩劉丹亦有畀意見，「丹爺次次都同我講我做得好，『其實你係安慰緊我，定係我真係做得好呢』，我有去問佢，佢都有解釋點解覺得好，丹爺係非常之錫我。」
新網站www.stheadline.com已推出
|
鍾意就快D Share啦！
|
|
|