第41屆香港電影金像獎今（9日）於尖沙咀文化中心公布入圍名單，近期備受爭議的電影《給十九歲的我》入圍「最佳電影」、「最佳剪接」、「最佳導演」。但名單公布不久，英華女學校發聲明指，該片決定退出香港電影金像獎「最佳電影」退選。
香港電影金像獎協會主席爾冬陞，對於張婉婷執導的紀錄片獲三項提名，他表示：「我知道係有爭議，部電影5號宣布唔上映，我6號先同金像獎嗰邊開會，我都有上網追睇番啲新聞，但我冇聯絡過張婉婷、學校同參與學生，我相信佢哋係處理中。依家電影入咗圍，董事局係會密切留意，謹慎處理，有啲董事局成員係無睇過呢部戲同唔知有關新聞，我都冇睇過部電影，唔可以只聽外界聲音而去判斷。（電影係合資格提名？）我哋係2022年12月31日截止報名，電影係合乎售票公映時間嘅要求。我哋都好被動，董事局會開會，我個人希望佢哋可以斡旋成功。」講到該電影的校方在社交網公布退出金像獎「最佳電影」的遴選，他稱今日會跟董事局有例行會議，屆時會把相關問題提上議程：「但要正式收到校方嘅通知先，當然我哋會小心處理，因為社會上好多分歧，等我哋了解咗件事先。（會唔會同校方了解？）我哋要核實件事先。（咁個提名會後補定係從缺？）我唔知，答唔到你，有好多方式去處理，董事局係有保留同決定，但好多問題要關注，係好難去處理。」
另外，今屆金像獎只有33套電影入圍，數量較少，他坦言：「冇辦法，因為上屆係兩年夾埋，加上上年年頭開戲比較混亂，戲院又停咗，我都預咗少，我之前擔心少過30部添，但就算唔夠30部都會照搞。」他指明年將會是自己最後一屆擔任主席，希望可以有接班人，否則不會有新改變：「香港電影依家弱勢，金像獎係唔可以縮，今年行紅地毯嘅地點都轉咗，想畀人煥然一新感覺，同巿民近距離接觸，雖然量係少，但都係好有影響力，唔可以矮化自己。（依家已經通關會唔會請海外嘉賓？）呢個未知。我爭取緊下屆可以喺內地平台同電視台轉播。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
