現年三十三歲的蔣家旻，今年初憑全城熱議劇集《美麗戰場》中的「反骨琪」一角，在《萬千星輝頒獎典禮2022》中勇奪「最佳女配角」獎，入行十六年，終於吐氣揚眉。
近日盛傳其日籍舊愛松岡哲也搭上龔嘉欣，不過，自爆單身近三年的蔣家旻，亦不愁寂寞。日前，本刊就獨家拍到，她孖住一名高大的四眼中佬，到沙田的商場溫馨睇傢俬；期間，兩人零距離密密斟、購買時有商有量，關係殊不簡單。
感情生活多姿多彩的蔣家旻，自爆單身近三年。日前，本刊便拍得，他孖住一成熟中佬到沙田的商場睇傢俬，而男方更做「柴可夫」揸她的車離開。
單身三年
十七歲入行的蔣家旻，在無綫已十六年光景，由《天與地》演少女版佘詩曼初露頭角，到鄰家女孩慢慢轉型至《反黑路人甲》的冶艷水姐，再到去年《美麗戰場》的「反骨琪」，終大放異彩！由二○年贏得「飛躍進步女藝員」，至今年初再下一城攞埋 「最佳女配角」，演技備受肯定，人氣更大大提升！
事業大有起色，蔣家旻自言現時工作至上，還自爆近三年沒有拍拖，創下最長單身時間的紀錄。據悉，她對上的一段戀情，便是日籍甜品師松岡哲也；而舊愛近日就被揭搭上另一花旦龔嘉欣。有傳，蔣家旻當年經常上松岡的家過夜，以及一有空檔便到男友的蛋糕店打躉，兼會拎住蛋糕打卡做生招牌，為男友的生意宣傳。可惜，因松岡為人花弗，與蔣家旻拍拖期間，仍經常到中環夜蒲，且惹來不少女性埋身，最後疑似有第三者，令戀情告終。
當回應這段舊情時，蔣家旻的態度冷淡：「佢只係其中一位我喺香港認識嘅日本朋友。我無了解過對方嘅感情事，不嬲唔多聯絡，同埋係人哋既私事。」事實上，蔣家旻的裙下之臣也不少，去年十二月底在訪問中，她曾透露有人等足她八年都冇變心：「佢最近一個月又表白過三次，我都拒絕，我知道佢放唔低，再畀啲時間再了解吓先。」她又指，自己的個性較急躁，而男方則冷靜，其實很夾得來，所以仍在觀望中。
此外，正值上位的蔣家旻，強調想多花兩、三年時間衝擊事業，下一站向「視后」進發，故有意再次搬出跟父母同住的梨木樹公屋單位，自行獨居，一來貪私隱度高，二來方便集中精神工作，「大個咗想要私人空間靜一靜，有時開完工想沉殿吓。我或者搬去屋企附近，咁就雙贏，有私人空間又有得黐屋企。」
兩人孖住同行，但卻保持距離；期間，蔣家旻低頭睇手機，中佬就不停回頭留意她。
一車共用
其實已大個女的蔣家旻，對事業和感情有晒定位，同步發展都應付自如。日前，她在電視城收工後，先駕車接了一名外形高大、頭戴黑色cap帽、身穿黑色衫褲的四眼中佬，然後直駛到沙田一間主打賣家具用品的商場，似為獨居做準備。兩人全程孖住遊走多間傢俬店，邊行邊交流，零距離密密斟；而蔣家旻一度睇中一張約六千五百元的梳化和四千六百元的咖啡枱；期間，她試坐之餘，又不停向店員查詢資料。揀完大傢俬，中佬又陪蔣家旻到另一精品店，挑選家用品，最終買了一大袋；而男方更有風度地幫她拎着。
兩人行了約兩個多小時，縱使蔣家旻跟中佬有商有量，但卻不時前後腳，保持距離。唯獨離開前往去停車場攞車時，見周遭冇人，他們才行得較貼近，她還大方讓男方做「柴可夫」，一車兩份揸，似乎跟男方關係不淺，跟着便絕塵而去。
蔣家旻每挑選的物品，都跟中佬有商有量，對男方十分信任，關係殊不普通。
|
鍾意就快D Share啦！
|
|
|