無綫歌唱比賽節目《中年好聲音》，正進行得如火如荼。當中，出名是人靚聲甜的支嚳儀（Venus），就被視為大熱；不過贏盡掌聲的她，卻相當謙虛，表示能夠進入這個階段，自己已經感覺贏了！她憶說：「小時候媽媽禁止我入娛樂圈，諗番起當年佢真係做得好啱，因為我心智未成熟，入行一定會碰釘，o依家我有家庭做我後盾，輸贏已經對我唔重要。」
Venus經常被朋友笑指她不能唱悲情歌，因為她擁有自己的事業、美滿的家庭，還天生樣靚身材好，怎能夠演繹悲情呢？本刊來到她位於何文田的豪宅，就完全感受到她的幸福。這個一千六百呎的單位，無論裝飾、擺設，皆儼如一個示範單位，她笑指：「我唔可以比屋企有雜物放喺我眼前，我要收納得好好，因為間屋整齊，就係女人最好嘅風水，夫妻都會和順一啲。」
早前，支嚳儀演繹《愛情陷阱》時，便大膽注入迷幻的元素，令這首經典歌耳目一新，就連譚詠麟都大讚，所以她獲得全晚最高的九十一分及MVP。
支嚳儀百足咁多爪，故每天回家差不多都是晚上了。難怪，她表示於中午在露台歎茶，幾乎是不可能發生的事。
美好回憶
現年三十六歲的支嚳儀（Venus），在《中年好聲音》中，因為樣子甜美，加上唱功了得，而成為焦點。早前，她演繹《愛情陷阱》一曲，就連原唱者譚詠麟都大讚，並奪得這個回合的最高分九十一分，難怪被視為大熱門。
大學時期，在美國三藩市攻讀工商管理的Venus，家教甚嚴；不過，憶記起當年媽媽的管教，今已為人母的她，就完全感受到母愛的偉大：「當年我過去美國讀書，媽咪因為唔想我再聯絡香港嘅損友，於是用心良苦cut晒我所有聯絡香港嘅嘢，包括：電腦、電話。當年，我係住喺一個台灣牧師嘅屋企，佢好鍾意聽歌，記得嗰時我因為冇乜嗜好，心情空虛，於是不停聽歌、唱歌，仲周圍參加比賽。」Venus笑指鍾意音樂，可能是遺傳，因為外公及媽媽都很喜歡唱歌。
經營醫療、羊毛出口生意的支媽媽，是Venus的偶像；而自小已跟隨母親姓支的她，甚有對方的女強人風範，「媽媽係上海人，佢做生意真係好叻！其實，佢係我嘅啟蒙老師，我o依家做生意都係跟佢學嘅；另外，佢唱歌都好叻o架，佢鍾意一面紮馬，一面唱歌，出一身汗，佢就覺得自己做咗好多運動。記起當日佢叫我唔可以咁細個入娛樂圈，佢話因為我早入行，人生冇歷練，就好容易受傷。我o依家乜嘢都有，嚟到參加呢個比賽，得與失對我嚟講唔重要，我只係想留個回憶俾自己，老咗睇番自己都曾經喺舞台上面。」
今年三歲的Joji，與媽媽感情要好，支嚳儀只要沒有工作在身，就會全天候陪伴兒子。
這間一千六百呎的豪宅，儼如示範單位，支嚳儀笑指只是雜物收納得很好。
走廊的盡頭，就是支嚳儀的私人空間，這裏除了是她的工作地方，還是她唱歌發洩的地方。
各具特色
經營烘焙生意的Venus表示，現在剩下來的參賽者，就好像甜品一樣，各有特色，她哈哈大笑說：「其實冇話邊個贏咗、輸咗，就代表嗰個人唱得好定唔好。嚟到呢個階段，我哋呢幾位參賽者，就好似唔同嘅甜品，好睇個人口味，有啲人鍾意食栗子蛋糕、有啲人鍾意食綠茶蛋糕，我哋每個人都有特色，都係好味嘅甜品。」Venus表示自己的優勝之處，就是擁有自己的風格，以及在舞台上有壓台的感覺。
喜歡創業的Venus，直言這個舒服的家，就是她最放鬆的地方。現時經營烘焙、榴槤、唇膏、蠟燭生意的她，每日都要處理公司及三歲兒子的事，忙到一頭煙，「我之前係同奶奶一齊住九龍塘嘅獨立屋，因為囝囝識行路，驚佢會跣親跌落樓梯。好開通嘅奶奶，於是就叫我哋搬出去，因為小朋友大個咗，奶奶都驚因為小朋友嘅教育方式唔同，會令到婆媳關係唔好，所以我哋就搬咗過嚟呢度。」
為了兒子，裝修前Venus特意參與設計，她自信滿滿的說：「我啲設計概念都唔差，你睇吓我屋企係冇雜物，呢度嘅牆身其實全部都係收納櫃，左邊嘅所有櫃全部都係俾囝囝放玩具，有好多家長鍾意將啲玩具放出嚟，方便小朋友揀，咁樣係唔好嘅，因為你收埋咗，佢自己打開櫃桶去搵，先有新意。如果放咗出嚟，佢睇到悶，佢就唔會鍾意玩。」另外，Venus覺得有事業的女人，更加需要收納空間，因為這樣才有地方休息，一間齊整的屋企，是令到夫妻和睦最大的元素，因為四周凌亂，好容易心煩氣躁，夫妻關係就會不好。
自小已經跟JW王灝兒及賭王愛女何超蓮一齊玩的支嚳儀，年前她的烘焙店開張，就請了兩人來做剪綵嘉賓。
|
鍾意就快D Share啦！
|
|
|