藝人方力申（小方）日前被東網獨家爆再墮愛河，與「翻版馮盈盈」葉萱（Maple）拍拖，當時他表示留待今日（4日）出席活動才正式回應，他依照承諾「找數」，性格開朗的他事前突然變得緊張，受訪時則大方承認拍拖一事：「想同關心我嘅朋友講，你哋可以恭喜我嘞！」
他形容雙方走在一起的時間很短，本來打算地下情一段日子才公開：「紙真係包唔住火，可能身邊朋友唔覺意爆咗出嚟，咁都有好有唔好，依家可以大大方方嘞。」小方又大讚女友貼地：「帶佢去酒店食飯，佢竟然話鍾意食茶餐廳。（其實點樣認識嘅？ ）唔重要啦，唔係阿Bob（林盛斌）介紹。」
雙方已見家長
他又指拍拖不足1星期，雙方已見家長：「我其實好認真，當覺得個女仔係好嘅，就想畀屋企人見，不過佢爸爸比較緊張，話我做娛樂圈睇中佢個女啲乜，首次見對方時，佢叫我唔好介意要好認真咁同我傾偈。（過咗關？）係，依家係處於雙方好信任同舒服嘅關係。」
談到盛傳Maple曾於韓國信奉邪教，曾遭「教主」性侵兼早前接受紀錄片訪問，公開事件的真相，曝光了34秒恐怖變態錄音，小方大方回應：「係佢！想同關心我哋嘅朋友講，我咁多年拍冇拍拖，好相信緣分呢回事。認識佢嘅第一日，佢已經將所有過去嘅事話畀我知，所以我覺得呢個女仔好特別。我先係由朋友開始，想了解佢更多，發覺佢言行一致，所以對佢100%信任。」
而Maple一連三集的訪問已推出，小方表示有觀看：「我覺得冇睇過嘅朋友都應該要去睇，因為裏面講到欺凌同父母關係唔好，係好影響小朋友，壞人會利用你呢刻嘅脆弱。我睇嘅時候好心寒，大家可能覺得佢好天真同幼稚，但佢應該比好多人更加堅強！佢係第一個行出嚟發聲同見樣嘅人，唔代表佢可以完全面對壓力，佢曾經同我講，不如當發咗場夢就算，但係彼此都好鍾意大家。我就同佢講，你行出嚟就係唔想有下一個受害者，呢個咪係你嘅初心囉，有幾多人知道唔係更加好咩？」
讚Maple堅強
小方坦言公開後，旁觀者會留意他們走得多遠，他亦有向身邊朋友提及女友過往的經歷，朋友讚Maple堅強：「應該咁講，感情嘅嘢預計唔到，但依家我哋雙方家長都好支持佢。（閃婚？）呢層唔好畀壓力我，真係啱啱開始咋。」他又不認同用「黑歷史」來形容女友的經歷，強調她是受害者，完全沒有做錯：「人最痛苦係幾信任嘅人出賣，信仰好堅固，當佢送咗10年之後先知道成件事係假嘅，你話佢有幾痛苦呢？（佢已經走出陰霾？）未完全，佢都有睇心理醫生，成件事仲未完，遲啲佢仲要去韓國出庭應訊，要在一次面對。（陪佢一齊去？）一定會爭取。（覺唔覺得你夠個女仔出火坑？ ）唔可以咁講，緣分嚟嘅。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|