「宇宙最強」甄子丹大女甄濟如近日出道做歌手，以「星二代」之名殺入樂壇，其實圈中都有唔少明星之後，盡得父母嘅最強基因，由細靚到大，認真「贏在起跑線」！
張兆輝 張卓姿
藝人張兆輝有女初長成，現年19歲嘅女兒張卓姿（Twiggy）愈大愈靚女，被網民譽為「兩代嘉欣混合體」，相似兩大美女鍾嘉欣及李嘉欣，仲曾經做過模特兒工作，為雜誌拍攝時尚靚相，獲讚星味十足，甚至被力推選港姐，成為新一代嘅最靚星二代。不過佢就似乎鍾意影人多過畀人影，於英國修讀攝影課程，未知日後係咪以幕後身份入行呢？
翁虹 劉蒔
要數新一代嘅靚靚星二代，又點少得亞姐冠軍翁虹女兒劉蒔（Crystal）呢？15歲嘅佢遺傳咗媽咪嘅美麗基因，擁有一雙水汪汪大眼睛，仲被內地網民封為「最美星二代」，顏值稱冠。佢仲話自小喺片場長大，絕對有興趣入行，不過依家年紀尚小，目前以學業為主，只會以玩票性質兼職拍攝，靚女又咁識大體，唔選美真係嘥晒！
邱淑貞 沈月
但講到「最索星二代」，最廣為人知嘅緊係一代女神邱淑貞女兒沈月沈月同媽媽一樣仙氣爆棚，細細個已經成為全城焦點，身為時尚王國千金嘅佢，更擁有超模天分，成為時尚界寵兒，經常現身國際時裝騷，更係「集郵王」，同唔少天王巨星都有交情，人緣冇得輸！
龔慈恩 林愷鈴
同沈月平分秋色嘅，仲有龔慈恩女兒林愷鈴！同樣擁有「最索星二代」稱號嘅佢，不但遺傳到媽媽嘅高顏值，更盡得演藝天分，以演員身份出道，拍過唔少電影、劇集，近年仲因為先後同MIRROR成員Edan、AK等合作拍劇拍MV，而人氣急升，不過佢最近疑同英皇鮮肉楊天宇撻着，名花有主！
張智霖 張慕童
除咗靚女之外，靚仔代表就有張智霖同袁詠儀嘅兒子「魔童」張慕童！有兩位高顏值嘅父母，加上張智霖嘅混血基因，「魔童」當然係靚仔一名啦，就算戴住口罩，都遮蓋唔住個型仔樣，佢仲異性緣勁好，不時被金髮美女包圍住，艷福無邊！
本文作轉載及備份之用 來源 source: http://hk.on.cc
|
鍾意就快D Share啦！
|
|
|
