已經淡出樂壇近3年嘅天后林憶蓮宣布強勢「復出」，繼早前到澳門開騷後，將於4月27、28及29日孖好友倫永亮喺紅館舉行一連3場演唱會，而未正式開騷前，佢頻頻喺社交網同粉絲互動，就連農曆年假期，都不斷更新社交網努力爭取曝光。
而農曆新年期間，林憶蓮飛抵日本京都度歲，更洩露其「吃貨」隱藏身份，見佢連續數日都喺分享唔少「食好西」嘅點滴，相中可見佢食咗各類味道嘅刨冰、佢最愛嘅鍋燒烏冬、懷舊麵包及小店嘅章魚燒等，十足拍攝飲食節目咁，真係隔住個Mon都聞到香味。
不過網民最感驚喜嘅係，貴為天后嘅佢竟以素顏上陣，兼且打扮樸素，但依然零走樣及零皺紋，完全唔似年屆57歲，尤其一對會笑嘅招牌「矇豬眼」，予人濃濃嘅親切感覺。佢所試食嘅全部都係貼地美食，普羅打工仔都消費得起，故有網民指憶蓮有做平民美食家嘅潛質，期待佢開騷之餘，亦推出飲食節目，帶粉絲食勻世界各地嘅平價美食。
本文作轉載及備份之用 來源 source: http://hk.on.cc
|
鍾意就快D Share啦！
|
|
|