陶大宇爆紅後不忘初心，近日見返40多年好友鄭家生仍熱情相待，仲一齊拍片食飯，相當重視舊情。兩人再見面相當開心，陶大宇稱呼對方為「家生哥」，並搭膊頭稱入行已認識對方，由細識到大。
陶大宇之後又同鄭家生食飯，被鄭家生大爆入行「瘀事」。鄭家生爆料指，當年陶大宇剛開始走紅之時拍古裝戲，竟因NG被導演杜琪峰爆鬧，「嗰啲老屎忽全部有晒嘢喺度，呢條友戇居居，人哋玩你又喺度玩......點知一正式，全部都有料到，一出嚟個個啲對白全部有晒，輪到佢一個人啞咗。跟住杜琪峰撳咪落嚟插佢話：『陶大宇！如果你下次再NG就停廠！』嘩，呢條友驚」陶大宇補充笑言：「攞個大聲公呢，全部停晒，就係向住我鬧。嘩嗰吓呢，真係好鬼『瘀』。」鄭家生稱杜琪峯在片場態度認真，「杜琪峰好嚴肅㗎，一拍嘢嗰時，唔係同你講玩㗎！」陶大宇又笑指：「都好呀，俾佢鬧過。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|