▲何伯接受《東張西望》訪問時表示，冇娶錯呢個老婆。
TVB節目《東張西望》日前報道，一名76歲老翁何伯9年前喪妻，近日遇上比他年輕30歲的內地婦，兩人認識兩個月便極速閃婚，何伯十分愛錫太太，贈送價值近30萬元禮物，包括10萬元名錶、逾2卡鑽戒13萬多元等，「新何太」亦戴住「愛的見證」受訪。
此外「新何太」似乎不想只是嫁人「享清福」，十分有進取心，想丈夫贈她百萬做生意。惟何伯5子女認為「新何太」對父親的身家虎視眈眈，雙方因而反目成仇。
昨晚（5月6日）《東張西望》繼續跟進事件，何伯表示近來曾多次致電給子女都沒有人接聽，而早前何伯染上新冠肺炎，子女亦不聞不問，對於供書教學多年得到如此回報感心痛。
何伯感恩太太在身邊陪伴：「冇呢個老婆喺度我點算？邊個服侍我呀？」
東張西望丨7旬老翁與46歲內地婦閃婚欲贈百萬做生意 子女反目提早拎走450萬存款
心疼太太被辱罵
何伯亦心疼太太被他的子女辱罵，何太表示：「佢哋搏命鬧我，鬧到我都怕咗，都唔敢再聽佢哋電話佢哋鬧我『姣X』、『臭X』、『大陸X』，仲有死八婆咁囉！我即刻Cut線就算，我一句都冇出聲。」
何伯表示：「佢哋咁樣鬧法我都好傷心。（大女）又話同我斬纜，又話同我攬炒呀咁！老竇幾十歲……攬炒？你咁後生同我攬炒？我咪咁話佢囉！後尾佢又唔聽我電話。」
何伯指子女絕情
何伯指大女曾在凌晨12時至清晨5時無間斷打50次電話給他，未知是出於關心還是想滋擾，甚至用訊息出言侮辱：「我親愛的父親，你死咗未？咁耐都唔覆電話。」
何伯現時居於太太家中，但其實他未搬家前是住在二仔家中，惟因何伯堅決跟何太閃婚，5位子女都以行動與爸爸劃清界線，除了不聽電話，二仔更將家中門鎖換掉，令何伯無法回家。
日前《東張西望》跟隨何伯回二仔家中想取舊文件，但開不了門，何伯表示：「有我啲雜物、有褸、有衫，喺我間房度，鎖住晒，攞唔到。我早15日前仲同我依家個太太返過嚟，同我攞過些少嘢，咁依家換咗鎖囉，返唔到入去喇！」
細女拒絕見父親
至於何伯細女，據何伯指她調走定期存款內的450萬元之後再沒有聽電話，上門亦拒絕見何伯。
何伯帶同《東張西望》到細女工作的醫院等待，但都未能成功見面，何伯表示：「佢好冇人情味囉！3月份我哋去搵佢，喺佢門口啲櫈坐喺度等，等到佢喺間房度出嚟，打個招呼話有啲偈同佢傾吓。咁啱我老婆喺度，我老婆笑笑口對佢好好禮貌，點知佢雙眼瞪實我老婆，即係好似想殺人咁。」最後細女更表示要報警，拒絕與爸爸溝通。而細女老公接到外父電話，更用粗口「回敬」長輩。
為老公感心痛
何太對於老公被子女離棄大感心疼，受訪時多番落淚：「好難受，又心疼我老公夾喺中間，佢啲仔女又咁樣對佢。佢唔應該受呢啲苦呀嘛，佢人咁好。佢哋唔錫我都錫吓佢呢個老竇」
何太指曾勸老公回到子女身邊，豈料何伯服過量藥物入浴室獨處想輕生，何太邊哭邊表示：「佢後尾頂唔順，成口都係血，佢頂唔順就自己拉開度門，我一睇到，問佢做咩。我走入去，個缸全部係血。嗰時我都唔知點算，我話『你唔可以死，你死咗，第日……你啲仔女嚟搵我算帳』。佢如果真係死咗，我就成咗罪人。」
堅稱對何伯真心
她再指明白社會有好多人行騙，惟強調對何伯是真心：「有啲人畀人呃咗啲錢真係好慘，但我唔會囉！」
何太更表示會承擔起照顧老公的責任：「我有一啖飯食佢就有，我唔會畀佢餓親。生意失敗嘅話我都會打工養佢，佢唔使憂喇！」
何伯亦選擇與太太繼續生活：「嚟咗咁耐，佢服侍我咁耐、照顧我咁耐。呢個老婆真係……證明我冇娶錯呢個老婆」
最新影片推介：
HKET App已全面升級，TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m
追蹤TOPick Whatsapp頻道睇最新資訊︰http://tinyurl.com/3dtnw8f5
|
鍾意就快D Share啦！
|
|
|
