李婉華80年代考入香港演藝學院，是演藝第三屆學生，讀了一年就被TVB發掘參演實況劇《香港的月亮》，之後甚至有電影公司等邀請她入行，而她最終決定放棄學業加入TVB。第一份合約為期五年，當時李婉華與港姐楊寶齡、李美鳳、邱淑貞等一同被力捧，幾年間已攀升上一線。
合約第四年時，TVB就與李婉華傾約，陳志雲說：「你咪好囉，有人同你傾，有好多冇人同佢傾呀，靜雞雞就走咗，你仲有用得嘅價值。」李婉華形容當時生活其實很拮据，工時長，收工很多時都已沒有巴士地鐵，要搭的士，而置裝亦是另一開支來源，「已經喺花園街嗰啲搵，都係入不敷支，好睇唔好食。嗰時仲要啱啱出道，（公司）化妝品又整到塊面好多粒粒，又要去睇醫生。」
她提到傾續約時的經過，陳志雲追問之下，她就直認跟自己傾約的是時任無綫藝員部經理趙崇文，對方在電視台位高權重，操生殺大權。李婉華指自己第一份工就是返TVB，對TVB好有感情，當對方娘家一樣，根本冇諗住走，不過她續說：「我真係冇忘本，但係新嘅合約，十年唔使講，仲要加幅係小到真係不得了！睇到條件眼淚就流，嗰時負責嗰位先生，趙生，就咁掟份約畀我，我一睇就流眼淚，我就話『其實你個加幅咁樣，我真係冇辦法，我而家要借阿媽錢使，我suppose要養佢，畀家用，而家要問返佢攞，我前景係點呢？』我好想繼續做，公司畀好多機會我，我根本就唔係一個鍾意討價還價嘅人，但係問題我要基本生活，結果傾吓傾吓都冇話No、冇話Yes，就咁就雪。」
李婉華指當時TVB好似覺得她很反骨，不過她就表示自己好忠心，又謂：「忘唔忘本唔係我哋話事，有時我都好希望基本生活到嘅、合理啲嘅條件啫，簽咗你，我賣咗身咁滯，出面所有工作都唔屬於我自己，所有嘢都係公司。」陳志雲問，當時趙崇文見到她哭有何反應，李婉華透露對方「冇乜反應」，亦冇遞上紙巾，「我係咁喊，係咁喊，係咁喊，我好容易喊，又唔知點同佢傾，佢話『係咁㗎喇，你自己諗吓』我根本都唔想走，亦都冇其他Option，當時好多好好嘅監製、好好嘅劇，我好多嘢好想試，我覺得冇人可以幫我同佢傾，我經理人就係你哋，你話點我基本上就係點啦，我話『你畀我生活到就得㗎喇，我買衫都買唔到，嗰時真係去女人街買衫……』」她說當時都有一定知名度，即使不是要著什麼大牌子的服飾，但都不想太失禮。
陳志雲曾是無綫電視廣播業務總經理，他聞言也有點驚訝，又有解釋電視台運作和死症，「呢個問題縈繞咗好耐，最後我離開之前，呢個問題仍然存在。一方面啲人捧咗出嚟，你好想自己用，但係你都要放佢喺出面搵食，或者放佢去大陸拍劇，因為拍一套劇等於你喺TVB拍成年，佢可以生活到，佢會明白我喺度就為名氣，出面就搵錢。」其實當時李婉華已非寂寂無名，陳志雲聽完她講的情況都問：「捧你要資源，但係你都已經一線，點解經理人唔幫你搵sponsor？」李婉華就解釋，當時借衫都要睇人面色，又說：「一套劇得幾套衫，所以要自己買，着得好寒酸，我唔敢去旅行，結婚之前都冇去過日本。」
李婉華透露，當時原本正拍攝《卡拉屋企》，結果劇組夾硬寫她移民，又邀請多位新血加入希望沒那麼難睇。離開TVB後，李婉華就靠自己在台灣、內地等闖蕩江湖，她再批評趙崇文：「簽約嗰時姓趙嗰個態度都好傲慢，當咗我係叛徒，我只不過唔應承你呢張約，我走咗之後佢態度非常之唔好，變晒臉。」她與陳志雲再討論TVB的雪藏文化，陳志雲說：「嗰時佢夠雪劉德華，人哋今日攞銀紫荊，有用嗎？」李婉華指，自己身邊認識很多大卡士的藝人，對TVB的印象都不好，離巢後不願意再食回頭草，陳志雲補充：「佢永遠覺得佢益你，你冇益過佢，嗰時劉德華同我講，亦都同過好多人講，佢覺得一隻手指可以捧起你，一隻手指可以捽死你。」
李婉華在影片最後再說，想不到TVB製作模式與人事依然幾十年如一日，狠批：「對於而家仲係用返我哋二、三十年前嗰種對藝人或者內部，都係一樣咁官僚、傲慢，我真係好surprised。我都冇做咁多十年，仲係聽到同一樣嘅嘢，仲有雪櫃嘅？仲要有人話佢忘本嘅？以前粵語長片先聽到啫，而家仲聽到呢啲嘢。我哋唔能夠進步，就因為仲有呢啲咁陳舊、不合時宜嘅制度，仲喺度做緊。」陳志雲就認為，很多決定未必是高層親自下旨，雖然一時三刻亦不可能改到TVB的模式，但他希望舊東家都可以留意下。
本文作轉載及備份之用 來源 source: http://www.hk01.com
|
鍾意就快D Share啦！
|
|
|