移民潮下的天時地利
BBO運作至今一年多，已擁有20萬訂閱人數，回想當日開台的初心，就是要製作一個定位全世界的頻道，不一定要在香港拍攝，將製作模式搬去全世界都可以。「我見韓國、泰國都有類似頻道，但香港好少人做到，做都係旅遊blog模式，所以睇中這個市場。」
過去出外地拍攝，最先解決是成本問題，單是機票住宿都佔一大部分，但近年不少香港人移居各地，混血肥仔本身都住在英國，去歐洲拍攝相對平好多。「是天時地利，加上不少工作人員都去了英國，形成一個契機，當周圍都有香港人時，我哋去到邊都拍片。甚至賣廣告模都得，就算是香港產品，大家都接受了在外地拍一樣可以。」想法新鮮，起初自然令人難以理解，甚至不懂替他們定位。「不少觀眾起初以為我哋係講移民資訊頻道。」
古生主動為頻道畀意見
數BBO的成名作，不得不提找到古天樂拍旅遊綜藝《尋泰記》，當初認識古生，是混血肥仔搞個人頻道時，在英國舉行了一場《明日戰記》放映會，還請到古生出席。「合作過程好開心，佢比我想像中搞笑唔嚴肅，甚至同我分享做YouTube及電影面對的問題，令我覺得他視野好闊，好肯同年輕人分享。」
自始二人開始多作交流，無錯，的確是古生主動跟他交流。「佢睇完BBO啲片，好睇唔好睇都會畀下意見，但好睇通常唔會講。佢對故仔特別有感覺，會提出不少改善空間，但每次到最後，佢都會講一句︰『我都係講下，畀啲意見你啫！』冇要你跟住改，但我唔會純粹去聽，會追問佢點樣做好啲。」
交流，最重要是要有溝通，既然大家都混熟，混血肥仔又可有就天下一出品的電影，給予點點意見？「我畀意見？我就唔會喇，因為大家都係做創作，明白每個創作當中會經歷好多次修改、取捨，背後有好多因素，最後能交出來的版本一定是最好的。所以大家已經唔係純觀眾角度分享，講落去可能仲會掘出好多創作嘅創傷後遺症。所以呢啲意見都已經冇乜大作用。反而同古生會講多啲外國電影同劇集，大家都從觀眾角度出發。所以古生點解咁鍾意去謝票，因為可以直接聽到觀眾意見，縱有些是客套說話，都會聽到觀眾心底那句。」
跟古生拍完《尋泰記》，令BBO最大受惠是接觸到更多的觀眾層。混血肥仔︰「有次去茶餐廳，有個人隔住兩張檯，都無端端指住我，我以為咩事，然後佢話︰『好嘢呀你！可以同古生拍片！』我都講聲多謝。佢哋可能從來都冇接觸呢個界別，這個節目開啟了大家溝通。」
搵甘比同「星爺背影」拍片
來到今次短劇《人生好似好很難》，這個新嘗試除了是潮流，更是混血肥仔一個心結。「BBO開台初期，有每月一片的安排，但出來效果未算成功，所以希望再嘗試一個新模式。首先要短，每集幾分鐘，因為再長大家已經可以轉睇Netflix，但短得嚟畫面又要精細，否則大家就會以為係Tik Tok片。」
而今次人選上，都有考慮更多，希望搵更多不同界別的人來Crossover，例如電視圈的陳凱琳，歌手吳浩康，最特別當然是甘比作首度演出。「甘比喎！每個人聽到甘比都會加個『喎』字，但其實佢好親切，好貼地。上次拍完佢教我勾織，一句話要手緊啲，令我諗到如果甘比問人借錢，到底會唔會成功呢？於是就有咗今次的短劇出現。」
更爆是，故事最後出現一個「星爺背影」，到底點樣諗到要動用到呢個星級背影？「度故仔時，我係諗如果被甘比呃完之後，仲有咩人呃佢，觀眾反應先會更大呢？然後就出現『星爺背影』，仲有兩句對白。」咁到底呢個又係咪真係「星爺背影」？「成個故事就係講呃，到底呢個係咪『星爺背影』呢？你係畀人呃咗定係真，成件事就保持呢份懸念，睇你信唔信！」
點解要驚錯？
作為一條YouTube頻道，搵到這個陣容拍埋短劇，似乎整個頻道又去到另一個Check Point，是高興的但亦有所憂心。「搵得呢個陣容做呢件事，自己當然係有信心，但好多事情都可以發生，如果最終View數唔好就好似拖累人咁，所以係有啲壓力。」
全劇6集已全部出街，反應和View數都有所交代，混血肥仔都可以鬆口氣。這刻他又想起跟古生的一次對話︰「佢做嘢向來好快，有次我問佢︰『咁快，你唔怕出錯咩？』佢答︰『點解要驚錯，錯完返去改咪得！』呢句又令我有所啟發，呢條橋唔得咩，咪下次再拍另一條，唔好驚咗唔敢去試。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|