近日歐錦棠就在其YouTube節目《乜乜棠水舖》大爆這些表演的造假方法，他當年都曾參與亞視台慶的雜耍和疊羅漢表演，跟外面的師傅受訓，但與吳剛師傅比，當然是小兒科。
然後他就解構了其中三個表演如何「出術」，更親自示範如何「滾油取物」！他說竅妙是白醋，落油後要倒入大量白醋，然後開火，他說：「好快就會滾，點解要用醋？因為沸騰度（沸點）低好多，亦都低過水，浮咗喺油嘅面，一陣間好快會有泡泡，就以為好熱好滾，俾人一種好似好滾嘅感覺。我『以身試油』畀大家睇，好快就見到有啲泡泡升上嚟，如果大盤啲，感覺好似好滾，煲到沸點，就算水都會焫手，而唔會好滾。」雖然有造假，但他仍呼籲家庭觀眾切勿模仿，始終有一定危險性。
第二個表演是「空手煮魚」，即徒手將魚煎到出煙，他解說：「條魚空心，劏晒啲內臟出嚟，加條發熱線喺裡面，穿出嚟喺手掌嗰度，戴啲護腕，電芯就喺嗰度，你唔係真係要煎熟，你要出煙畀個效果人睇咋嘛，撳咗掣你都唔知。」
第三個表演就是劉德華等藝人都做過的心口碎大石！他說大石是真的，沒有做手腳，雖然很多年前有人曾用硫酸溶石，但始終不清楚其腐蝕程度，有一定危險，又怕石太脆一扑就碎就好瘀，所以會用真「麻石」。而關鍵原來在於揸鎚的人，「你見唔會係藝員揸鎚，揸鎚扑嗰個係師傅出嚟，因為佢哋識得用鎚嘅力，（否則）一嘢落到底個藝員就會死，透過嚿石就內傷！」
歐錦棠續說，落鎚不是平面扑落去，而是用鎚邊位置，有尖銳的鈍力，亦不可一鎚到底，有一下焦點力「剁」下去就要馬上收鎚。此外，他說藝員會墊塊毛巾，通常師傅都扑大石的正中位置，在藝員心口低少少，不會扑上半或下半部，這樣藝員就不會太傷。然而，95年亞視台慶原來都曾經失手！當時示範心口碎大石的是馮寶寶（Bobo姐），歐錦棠就是司儀。
他憶述當年情況：「扑咗兩嘢都唔開，通常一下就開，咁你完成唔到，件事唔可以完成唔到，會好瘀，咁就話『再嚟得唔得呀？我哋整多吓』師傅可能見到咁情急就大力啲， Bobo姐就話『阿棠，整蠱我？』但係真係碎咗，佢都有啲好生猛，扮鬼扮馬樣，事後話畀我聽佢斷咗條肋骨，陰公，睇咗好耐醫生。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|