(Getty Images)
英超周六(14日)早場曼聯踢番場好波，作客3比0擊敗修咸頓，難得係門將奧拿拿更救出關鍵12碼，新加盟荷蘭中堅馬菲斯迪歷特、拉舒福特同阿歷真度加拿祖齊齊「開齋」，球迷期待已久嘅魔性重現。
「紅魔鬼」雖然贏波，但比賽初段一度受壓，被「聖人」前場壓迫幾乎失守，修咸頓18歲小將迪比寧表現活躍，7分鐘一記妙射要奧拿拿飛身撲救，其後一次扭波過人更博得12碼，不過甘馬倫阿奇操刀被奧拿拿救出，曼聯大難不死果然有後福，35分鐘一次短角球攻勢，般奴費南迪斯送入禁區，馬菲斯迪歷特頭槌建功先開紀錄。
曼聯入波後輪到拉舒福特發威，先有一次窄位勁射被擋出，其後禁區頂熨射終於收死蘭斯達爾，41分鐘曼聯贏到2比0完半場。
易邊後曼聯繼續搶攻，馬沙拉奧同拉舒福特都有埋門，直至修咸頓大幅換人，換入拉爾拉拿及賴恩費沙等具經驗球員，先穩住局面，尾段佢哋再有積克史堤芬斯飛剷阿歷真度加拿祖直紅出場，10人應戰更加冇得追，戰至補時曼聯阿歷真度加拿祖整多粒，贏夠3比0完場全取3分，修咸頓則4連敗。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
