原來江嘉敏受邀為一套長壽音樂舞台劇《我們的青春日誌》客串演出，她在當中飾演嚴校長的年青版。這套舞台劇較「易入口」，講中學生如何在追夢與現實，學業與愛情，已為成年人的校長為了現實而放棄夢想的悔恨等交織而成。
江嘉敏接受《香港01》訪問時，感嘆第一次欣賞這套舞台劇時已十分有共鳴，因為當年的她就是在「唔好發明星夢」之中走來：「真係好切身感受到劇裏面發生嘅事情，起初我夢想係要做演員，身邊好多人成日都笑我喺度『發明星夢』，屋企人係反對㗎。因為覺得呢行係好虛無縹緲，係大染缸，到而家佢哋成為咗我嘅VIP FANS, 有啲咩劇呀節目演出，佢哋都係第一個支持嘅人。我好多謝TVB 9年前簽咗我呢張白紙，畀我實現到我夢想。」
雖說多年來時不時有人笑江嘉敏是魔音，但當晚她演出時，無論是跳舞或唱音樂劇，都頗有水準：「我希望用我嘅努力去話畀大家聽，雖然未去到專業level，但係一定唔會係魔音，所以好多謝阿Tom畀咗個機會我呢個『新人』。」她也表示，回想起上一次跳舞，已是18歲（12年前），所以今次演出4場，也足足練了一個月：「返到屋企我係咁捉住我隻貓嚟跳，因為我跳嗰隻舞好多時都係轉圈轉完左轉右，我試過轉錯咗方向換錯咗另一個partner。」
江嘉敏初嘗音樂劇，她坦言與拍劇分別大：「平時拍劇會有自己嘅節奏，但係音樂劇要跟住音樂唱歌跳舞之餘，仲要喺限定嘅時間講台詞，仲要企位一定要100%啱晒，啲舞台嘅燈光效果先可以照到。起初頭嗰幾次練習都未完全可以pick up到啲timing ，所以都有好多蝦碌嘢，企唔啱個位我個人就黑咗，觀眾就見我唔到，哈哈！都有試過未趕得切講完對白就要入歌跳舞，所以都好多謝同我同場嘅演員係咁陪我練。」
被問到離巢後有沒有不習慣的地方時，江嘉敏就回答：「而家收入都叫做夠生活，我自己都會睇住個收入嚟做人嘅，鬆動啲就請吓屋企人去食吓大餐去玩吓，都要work life balance吓嘅。相反，咪食少幾餐當減肥囉。而家都係試吓自己處理所有事情，因為咁大個人都真係要學習多啲嘢，以前就有一個大家庭個個都照顧得無微不至，而家想親力親為試吓先，遲啲再考慮搵個經理人或公司。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
