古天樂被車撞飛彈十幾米
講到坐白車的經驗，古生原來都有超驚險的一次，整個人被Van仔撞到飛彈十數米，但最離奇是沒有大礙。「當時是中五畢業，開心得滯，唔小心衝出馬路畀架Van仔撞，撞到飛彈十幾米，校服碎晒，係碎晒！昏迷咗十幾秒。身邊同學猛叫我起身，我最後都起到身，識得猛話冇嘢，冇嘢！然後睇番撞我架Van仔，成個車頭凹咗一個人形出嚟，個司機瞓在軚盤暈咗。於是大家Call白車，呢次就係我第一次坐白車。我都冇留院，聯針就出院，反而司機要留院，佢個頭撞爆擋風玻璃。」成個過程講完，現場人人都覺得匪夷所思，但又是古生的親身經歷，十足超級英雄故事一樣。
袁澧林未熟習演戲被「大聲指導」
戲中袁澧林飾演一個爽朗兼爛口的女仔，在戲中粗口橫飛，而且流暢到不得了，問到袁澧林如何練習？「平時都有練開，哈哈哈……講粗口都有好處，唔係用嚟鬧人，喺抒發情緒方面係好好，令個人冇嘢屈住。」由於電影在4年前拍攝，袁澧林對演戲的觸感未夠，於是要以模仿搭夠。「我在拍攝時係扮緊導演卓韻芝，所以角色對愛情都有阿芝的風格，講嘢都係好直接，又有啲粗口。」
未熟習演戲，便遇上影帝古天樂，心驚膽顫，愈緊張就愈易出事，結果有場戲真的被古生在現場「大聲指導」。「呢場戲最後好似cut走，當時我記熟晒劇本，去到現場就諗住背晒出嚟，但其實現場好多變化，你要代入角色，用角色思維去解決問題，但當時我好明顯轉化唔到，完全做番自己反應，咁就錯晒，於是古生就指導我，唔講『鬧』呢個字，係大聲地指導。」
鬧完都有氹番
古生都直認不諱有這件事，但其實這是一種最快的方法令她達標。「呢樣係林嶺東教我哋，如果你進入唔到個狀態，就要搵一個方法進入。我都試過拍部戲，要個女演員喊，導演同佢講成粒鐘都未喊到，然後我走埋去講幾句，佢就喊到收唔到聲。Cut機後導演仲問我講乜，我話講佢老豆老母囉。唔係問候呀！真係講佢父母經歷，因為佢事前同我分享父母嘅經歷，我一直放在心，於是呢刻提番起佢就喊得出。」
問到袁澧林當時可有為此感不快？「一定會唔開心，但又真係演得好順利，只係事後都係會嬲爆爆，自己坐埋一邊，但當時古生就發揮鐵漢柔情，擰個頭問我︰『你點呀？』佢係唔望你，但都係關心，啲男人真係……哈！」
游學修同古生嘈過交？
袁澧林被古生鬧過，但游學修就相反，因為創作事宜跟古生有所爭拗，仲鬧得面紅耳熱。原來當時游學修正在參與劇本創作，但古生又忙於拍戲，於是捉游學修到片場，拍完戲收工便跟他傾，瞓醒又傾，如事者經歷個幾月。游學修︰「佢拍攝以外時間就係傾劇本，個幾月就是不停傾，期間都有月鬧交，有啲嘢講完你又唔聽！當時係嬲大過怯，不過鬧完就算，創作一定會有堅持，會有火花，如果下下你講乜都好好就唔使傾」
古生亦認同度橋過程一定包含爭拗。「係會咁，如果大家文質彬彬，就住就住係唔會度到嘢，一定要有鬧交，有時堅持會啱，亦有可能錯，但如果唔堅持，好順民去完成件事，呢個唔係一個創作。」結果二人合作至今又成為旗下藝人，證明被人鬧好，鬧人好，都係對事不對人，完了便抹走去重頭來話。
鳴謝
古天樂 髮型︰Dan Tam @ O4 化妝︰Carman Man
游學修 髮型︰Vic Kwan @II alchemy 化妝︰Yvonne Yeung
袁澧林 髮型︰Lupus_chui@ orient4 化妝︰Jenny Shih
Venue: The Mira Hong Kong
本文作轉載及備份之用 來源 source: http://www.hk01.com
|
鍾意就快D Share啦！
|
|
|
