歌手鄭欣宜神隱兼停工2年多，日前內地節目《歌手2025》宣布欣宜成為節目第七期補位歌手，而欣宜亦一早抵達長沙錄製節目。欣宜嘅表演環節今晚（27日）就會播出，不過未播先有綵排花絮出爐，更預早公布佢將會動人演繹代表作《女神》，連表演音頻都被公開，即被大批網友狂讚好聽。
狀態十足嘅欣宜喺片中，甫現身就笑晒口咁同全場打招呼，時不時大笑，又自爆想食遍長沙美食，情緒價值滿分，仲蹦蹦跳咁走去大讚和音姐姐靚女，又親民又熱情，仲表示自己唔會放棄唱歌呢條路。網友見佢狀態極好都表示放心，仲叫節目組要好好對女神，好希望佢可以留到總決賽。唔少粉絲都希望佢今次比賽之後，可以開內地巡唱，又期待佢喺比賽期間開啟吃播Live，令大家非常期待。
喺最新節目預告中，先後見到金牌經理人陳淑芬及天后容祖兒加讚欣宜，指佢連續兩年拎到「女歌手金獎」同「我最喜愛的女歌手」，容祖兒就大讚欣宜夠正能量：「她能夠在舞台上面發揮很多的光芒。」至於欣宜自己亦相當之有信心可以踢館成功，並聲淚俱下表示：「我很有信心的，我踏上舞台我就是Queen。」似乎今集節目將會大放催淚彈，感動網友。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
