馬菲奧斯根夏踢5人小型足球，展示細膩腳法。
曼聯新簽前鋒馬菲奧斯根夏近日返回巴西家鄉度假，不忘踢「衞生波」保持狀態，去到街場踢5人小型足球，展示細膩腳法及盤扭技術，走位靈活，速度又快，被指有2003年首次加盟曼聯時期C朗影子。
馬菲奧斯根夏落街踢波，並拍片放上社交網，佢話參加5人足球比賽，踢咗10分鐘。從兩條片段可見，呢位26歲巴西國腳赤裸上身，先係同對手「單挑」，頻頻使出假動作，企圖扭過對方。第2條片，馬菲奧斯根夏擺脫4位對手包圍，以一招「跳躍式」過人突破，再用後腳傳中，送出美妙助攻，動作非常瀟灑。
曼聯球迷及網民睇完都大讚馬菲奧斯根夏有料到，包括話：「完美10號」、「好波，太精彩」、「巴西C朗」。不過，亦有人擔心根夏踢街場好易受傷，勸佢適可而止，以免影響為曼聯備新戰新球季。
馬菲奧斯根夏上季為狼隊上陣36場入17球及6次助攻，曼聯早前斥資6,250萬鎊(約6.6億港元)收購佢，根夏上場世界盃外圍賽貢獻1次助攻，幫巴西擊敗巴拉圭，取得明年決賽周入場券，盡顯身價。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
