祖奧尼維斯(左)今場入2球。
周一(30日)凌晨世冠盃16強，歐聯冠軍巴黎聖日耳門(PSG)以4比0大勝國際邁亞密，晉級8強，倒戈嘅美斯報仇失敗，遭遇職業生涯第6次吞4蛋。賽後呢位阿根廷球王遭「剝光豬」，將波衫、波褲、波鉢全套送贈畀對手奧士文尼迪比利，可以話係以德報怨。
美斯曾經承認2021至23年效力PSG期間過得唔開心，最後不歡而散離隊，今仗被視為佢復仇之戰。不過，兩隊實力相距太懸殊，美斯獨力難支，開賽6分鐘，PSG由祖奧尼維斯接應罰球，頂入打開紀錄，踢39分鐘，呢位葡萄牙國腳射成2比0。
國際邁亞密屋漏偏逢連夜雨，中堅湯馬士艾維利斯擺烏龍，跟住夏基美亦建一功，PSG上半場已經領先4比0。大局已定之下，PSG下半場明顯有所留力等踢8強。
賽後美斯表示輸得口服心服：「PSG係一支偉大球隊，仲係歐聯冠軍，如我所料佢哋表現非常出色，我哋已經盡最大努力，令大家對我哋留下良好印象。」國際邁亞密教練馬斯真蘭奴透露，美斯有傷在身，但堅持上陣為球隊作出最大奉獻。
因傷錯過分組賽嘅PSG射手奧士文尼迪比利今仗後備上陣復出，並成為「大贏家」，佢喺社交網展示「戰利品」，獲得美斯全套裝備，真係羨煞旁人，巴黎聖日耳門打入8強將遇上勁旅拜仁慕尼黑。
本文作轉載及備份之用 來源 source: http://hk.on.cc
|
鍾意就快D Share啦！
|
|
|