視后楊茜堯、林夏薇去年憑劇集《黑色月光》贏盡口碑，二人月底將再度攜手開拍重頭劇《玫瑰戰爭》，劇中做頂流女星「互片」，火花四濺！此劇女主戲份較多，但有3 大視帝陳豪、陳展鵬及馬國明驚喜助陣，展開娛樂圈激戰！
無綫與內地不斷開拍合拍劇，不論卡士及投資都比之前強，上年已露風聲、由蔡少芬及朱茵擔演的邵氏劇集《風華背後》日前已舉行開鏡儀式，《造星帝國》則一直只聞樓梯響，至於去年已在內地進行拜神儀式的《玫瑰戰爭》，終於鐵定本月底開機拍攝。不過隔了半年有多，陣容來個大洗牌，女主角除了林夏薇（薇薇）、姚子羚外，還會加入之前在《黑色月光》跟薇薇鬥個你死我活的楊茜堯。男主角方面， 除了原有的陳展鵬，陳豪及馬國明亦強勢加盟，3大視帝跟兩位視后的娛樂圈大戰一觸即發。
楊茜堯去年返娘家演台慶劇《黑色月光》，與演奸角的薇薇擦出亮眼成績，收視、口碑俱佳，今次在《玫》劇則爆發影后復仇戰，更捲入富豪碎屍案，而3大視帝分別飾演影視公司老闆、男明星及富二代，劇本睇頭十足，無綫小花陳楨怡及鄺潔楹亦會演女星， 近年好戲連場的陳自瑤則獲安排重要角色。
馬國明心急刨劇本
薇薇昨日在社交網分享看劇本做功課的照片，並配文：「會是怎樣全新的你」，她受訪時說：「依家為咗準備角色要閉關，令自己進入新角色狀態。」楊茜堯受訪時亦說： 「劇本我仲未攞齊，依家忙緊小朋友開學嘅嘢，要忙埋佢哋啲嘢先可以投入到工作。今次人物嘅複雜程度應該比《黑色月光》高好多，所以好期待收晒啲劇本。（你開工，老公羅子溢要湊仔？）係呀！佢都會開，但唔使開劇住就可以集中啲照顧小朋友，出面嘅工作，就到時間就OK ！」
驚喜加盟的馬國明坦言還未看完劇本，受訪時說：「今個月底我哋會喺深圳正式開工，我已經刨緊劇本，早兩日喺嗰邊試造型、開會，又同監製傾吓個角色點樣做。（同楊茜堯好耐冇合作？）係呀！佳哥（鍾澍佳） 都想我哋再合作，上次《黑色月光》其實佳哥已經有搵我，但因為當時拍緊《執法者們》，所以拍唔到。我同阿怡（楊茜堯）好耐冇合作，有時影張相放上網，啲觀眾都即刻回憶番《On Call 36小時》，我哋曾經係一對幾深入民心嘅CP，所以今次再合作好開心。」陳豪亦說：「我同阿怡真係好耐冇合作，比馬國明仲要耐，好期待。」至於陳展鵬受訪時表示首部擔正男主角的劇集《真相》就是跟楊茜堯合作，拍完對方就結婚。說到跟他合作過的女星鍾嘉欣、薇薇及陳茵媺等都是拍完劇就結婚，展鵬笑說：「個個同我合作完最大嘅願望就係可以結婚，哈哈！」
陳自瑤成關鍵人物
而劇中獲安排重要角色的陳自瑤（YoYo），不久前拍完監製鍾澍佳的劇集《刑偵12》及《模仿人生》，她說： 「好多謝佢咁多部劇都預埋我，今次個角色同個個都有啲戲，我同薇薇未正式合作過。（點樣準備？）劇入面咁多好戲之人，做番自己就得。」鄺潔楹則飾演一個為求目的不擇手段、充滿野心的女星，角色甚具挑戰性。
等了又等 蔡潔撞期焗辭演
藝人蔡潔近年劇接劇，獲不少劇迷支持，她去年底曾於內地參與《玫瑰戰爭》的拜神儀式，但由於劇集相隔多時才開拍，而她亦已安排拍攝另一套邵氏劇集《風華背後》，故因撞期而辭演。此外，據知原定參演的陳星妤及張兆輝亦無緣拍攝。
對此，蔡潔受訪時坦言：「除咗我之外，有幾個本身參與《玫瑰戰爭》嘅演員都拍唔到，我都係準備好，一直等通知，但係如果你問我，可以嘅話，辛苦啲我都希望參與到，因為之前睇過少少劇本，劇裏面有幾個好朋友，我諗都幾好玩。不過我都想像到，如果同時要開晒兩套嘅話，真係會辛苦嘅，我相信呢啲都係最好嘅安排，公司安排得一定有原因，希望兩套劇製作都好，我依家就專心準備拍《風華》。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|