成龍談到《捕風追影》劇情時，透露一位同為「七小福」的重要演員戲份，竟被全段剪走：「元秋嗰場冇咗㗎！成場冇咗，我叫導演一定要保留返入屋摀住佢個嘴、話警察做嘢呢兩個鏡頭。」表示原本元秋戲份更詳盡完整：「一般一套戲有2、3000個鏡頭，我哋拍咗5000個鏡頭，剪咗千幾個！」亦表示有許多精彩演出，包括周政杰在基地中挨打的完整場面，均被忍痛剪走。
多年未有返港拍戲，成龍表示入行初期已耗盡靈感：「香港好多嘢都拍晒，諗唔到故仔可以拍！所以諗一個警察去到外地會點呢？就好多靈感撞出嚟。（如果在啟德體育園場館？）有故仔就得，香港好多大廈都唔畀拍，我去外國指住邊棟大廈人哋都畀，（澳洲）歌劇院唔畀人上去，但畀我上去拍、畀我喺上面炸！」梁家輝表示啟德場館作為新香港地標，推介成龍大哥一試，成龍則表示毫不容易：「香港會展問佢借幾多次都唔畀，係我見到董伯伯（董建華），佢話『咩呀？等我同佢講！』先畀我喺上面拍《新警察故事》！」
至於接下來的新作，成龍表示手上計劃拍攝電影包括海外及中國電影，更透露稍後更有機會返港拍戲：「有一部如果得會拉大隊返香港拍，戲名未講得，會搵楊紫瓊！」
早前，成龍於瑞士「盧卡諾影展」獲頒終身成就金豹獎，享受歡呼與掌聲後，成龍感嘆地表示：「今年入行64年，估唔到以前嘅付出、傷痛、堅持，幾十年後得到回報。如果以前拍戲是旦，今日就冇咁嘅成就。」表示不少影迷至今仍會提起《A計劃》、《醉拳》、《蛇形刁手》等經典早前作品，嘆指：「覺得當年斷手斷腳都係值得嘅。我成日同佢哋講，多謝二三十歲時自己嘅努力，否則今天就會後悔。」
成龍早前到瑞士，出席盧卡諾電影節（Locarno Film Festival）獲頒「終身成就獎」榮譽金豹獎，以表揚在電影界的貢獻，他透露亦順道到英國探望為Marvel電影工作中的成家班︰「去倫敦開會，同埋去探班，我成家班拍緊《蜘蛛俠》，係成家班做動作導演，去睇佢哋綵排，個導演見到我即刻手騰腳震，等佢知道成班家其實係我啲人！」果然成龍大哥的影響力遍及全球，國際影壇的後輩均對他非常仰慕與敬畏！
本文作轉載及備份之用 來源 source: http://www.hk01.com
|
鍾意就快D Share啦！
|
|
|